Жас отбасыларға үй беріледі
«ҚТЖ-ЖТ» АҚ «Қызылорда-ЖТ бөлімшесі» филиалының директоры, «Nur Otan» партиясы «Теміржол» филиалының төрағасы Аманкелді Арысбаев жергілікті теміржолшылармен кездесіп, партияның кезекті XVIІІ съезінен алған әсерімен бөлісті.
«Nur Otan» партиясының «Теміржол» филиалының төрағасы Аманкелді Арысбаев Астанада Тәуелсіздік сарайында өткен партияның кезекті XVIІІ съезіне сырбойылық теміржолшылардан 3 делегат қатысқанын, ел тарихында таңбаланған маңызды оқиғаға куәгер болғандарын айтып өтіп, Президент жария еткен әлеуметтік бастамаларға, көпбалалы отбасының өміріне үлкен өзгеріс әкелетін батыл да нақты шешімдерге тоқталып өтіп, жаңа Үкіметке берілген нақты тапсырмалардың көпбалалы отбасыларды қолдауға бағытталып отырғанын жеткізді.
– Съезд жүктеген міндеттерді Қызылорда ЖТ бөлімшесі өз тарапынан орындауға дайын. Атап өту керек, Елбасы жүктеген міндеттерді қызылордалық теміржолшылар тиімді жүзеге асыруда. Мәселен, «Нұрлы жер» бағдарламасы аясында жаңа үй құрылысы жұмысын аяқтап, осыған дейін Сексеуіл кентінен 16 жас отбасыға тұрғын үй берілді. Ағымдағы жылы жас отбасылар үшін тағы 20 үй берілуге дайын. Яғни, барлығын қосқанда 76 жас теміржолшыларды баспанамен қамтамасыз етеміз, – деді Аманкелді Арысбаев.
Сөз кезегін алған партия филалы төрағасының бірінші орынбасары Базара Танбаева да «партияның жергілікті бастауыш ұйымдары тұрғындардың күнделікті мәселерін шешуге белсене атсалысатын болады», – деген Елбасының сөзін жеткізіп, партияға жүктелген міндеттерге тоқталып, көпбалалы отбасылардың барлық мәселесі «бір терезе» арқылы шешілуі қажеттігін, қажетті құжаттарды жинау үшін мекемелердің арасында уақыт жоғалтпай, бюрократтық созбалауға салуға жол бермеу үшін партия өз көмегін беруге дайын екенін жеткізді.
Сабырхан СЕЙІЛБЕКҰЛЫ, Қызылорда