Бұрымдылар бастамасы
Осыдан төрт жыл бұрын Семей бөлімшесі бойынша жастардың қайырымдылық акциясы бастау алған болатын. Өңірде ұлттық компанияның әлеуметтік сала бойынша басымды бағытын жүргізуді Ләззат Айтмұханова, Динара Берікханқызы, Айгерім Тоқпанова сынды жас теміржолшы қыздар бастамасымен қолға алынған бұл шара күні бүгінге дейін үзіліссіз жүргізілуде әрі нәтиже беріп келеді.
Құрбы-құрдастар арасында «Сұлулардың үштігі» атанған белсенді бұрымдыларды бүгінде күллі желі бойындағы теміржолшылар жақсы біледі. Оған негіз де жоқ емес. Айта кетерлігі, команда құрамында көлік жүргізуші жігіттерді қоспағанда барлығы да қыздар. Оның себебі де бар. Әр тоқсан сайын бөлімше фойесінде тәтті-дәмді тағам түрлерін пісіріп әкеліп, жәрмеңке өткізу – бірінші кезектегі міндет. Ол әлбетте қыздардың ғана қолынан шығады. Одан соң, арнайы комиссияның ұйғарымымен түскен қаражатты мүмкіндігі шектеулі балалары бар көпбалалы отбасыларға тарту ету. Жалпы, бастамашыл жастар оннан аса жәрмеңке өткізіп, жалпы сомасы шамамен 400 мың теңгеге тарта қаражатты әлеуметтік тұрғыдан аз қамтылған теміржолшылар жанұяларына табыс етіпті.
– Қайрымдылық сынды ізгі қасиеттің қазақ қыздарының бойынан көрініс табуы – қалыпты жағдай. Басқаша болуы мүмкін емес. Жәрмеңке ұйымдастырар кезде жұмыстан кейін барлығымыз бір үйге жиналып, саудаға шығаруға дастархан мәзірлерін пісіреміз. Түні бойы әзірлеп, ертеңгісін оны жәрмеңкеге шығарып, әріптестерімізге саудалаймыз. Қайырымдылық шарасына бөлімшенің қыздары ғана емес, жігіттердің де немқұрайлы қарамайтыны жүректі жылытады. 5-10 мың теңге ұсынып, тек екі тал самса немесе бір түстік қана алып, қалғанын қорға тастап кететін талай әріптестерімізді, қарапайым инженерлерді кездестірдік. Яғни, ізгі мақсат жолында әсіресе жастар аянып қалмайтынына көзім жетті, – дейді Ләззат.
Бұрымдылардың бастамаларына бөлімше басшысы Марлен Көкірекбаев та қолдау білдіріп, әлеуметтік тұрғыда аз қамтылған жанұяларға көмек көрсету жолдарын құптаған болатын. Соның аясында қаладағы теміржол колледжінде қайырымдылық концертін көрсетіп, қажетті соманы толықтырып отыратын да кез болған.
Ләззат, Динара, Айгерім бастаған жастар қатарынан көріну кейінгі кезде жастар арасында абыройы өз алдына, үлкен сәнге айналғандай. Жуырда өткен мерекелік шарада бірдей киім киген бұрымдылар командасы орындаған флешмоб көпшіліктің көңілінен шыққаны сондай, сүйсініп ұзақ қол соқты.
Қуаныш ҚОЖАЕВ, Семей