Қызылорда станциясындағы техникалық кітапхананың жаңа деңгейі
Білімнің бастауы кітап дейтін болсақ, бұған дейін, яғни интернет ресустардың қолжетімділігі артқанға дейін кітапханашының жұмысы тек кітап алушыға қызмет көрсетумен шектелетіндей көрінетін. Ал қазіргі сандық технология әлемі кітапхананың да қызметін жаңа деңгейге көтеріп, тиімді және пайдалы санатқа енгізді.
Осыған орай теміржолшылардың ой-өрісін кеңейтіп, дүниетанымын дамытып, күнделікті ақпарат ағынынан сусындап отыру үшін қызмет ететін кітапханалар өз жұмыстарын қайта құруда. Сала теміржолшыларының кітапханадан алатын ақпараттарының жылдамдығы мен қолжетімділігін арттыру, ақпарат алудағы икемдіқолайлылық және сұраныстың қанағаттануын қамтамасыз ету үшін кітапханашыларға үлкен жауапкершілік жүктеліп отыр.
Ұлттық компанияның Технологиялық орталығына қарасты Қызылорда станциясындағы техникалық кітапхана да теміржолшылардың сұранысын қанағаттандыруға барынша бетбұрыс жасауда. Ол үшін орталықтандырылған ақпарат жүйесі, айналмалы пошта, ақпарат күні ұсынылатын жаңалықтар, мерзімдік БАҚ түрлері таратылып, ғаламтор жүйелер арқылы теміржолшылардың және өзге филиал оқырмандарының да өтініш-сұранысына сай қызмет атқаруда. Сонымен қатар техникалық кітапханадан теміржолшылар жан-жақты ақпараттық қызмет алумен қатар, өздеріне қажетті теміржол көлігі саласындағы жаңалықтармен хабардар болу, пойыздар қозғалысы қауіпсіздігі көрсеткіштерін төмендету материалдарына қолжетімділік, техникалық қауіпсіздік пен еңбек қорғау, теміржол саласындағы өнертапқыштық тұрғысында жарияланған жаңалықтармен дер кезінде танысу мүмкіндіктері қарастырылған.
– Қазіргі таңда ескі техникалық кітаптарға сұраныс артуына байланысты кітапханада сирек кездесетін ескі кітаптарды «ПДФ», «Паин-рейдер» бағдарламалары арқылы жүйеге тіркеп, баршаға қолжетімді еттік. Жалпы мерзімдік баспасөз өнімдері, маңызды ақпарат парақшалары секілді теміржолшыларға қажетті ақпараттың бәрі интернет кітапхана жүйесі арқылы таратылады және де айналым поштасымен де сұраныс жіберген теміржолшыларға қажетті ақпараттар жөнелтіп отырамыз. Жалпы алғанда теміржол саласының техникалық кітапханасы қолжетімді әрі сұранысқа сай жұмыс жасауда. Техникалық әдебиеттерге сұранысты қанағаттандыру үшін ғылыми техникалық ақпарат және сараптама орталығы кітаптарды сандық жүйеге көшіруді қолға алуда, бұл жұмыстар бізде де қатар жүргізілетін болады, – дейді Қызылорда техникалық кітапхана қызметкері Райхан Темірғазиева.
Қызылорда техникалық кітапханасы әр айда тұрақты көрме өткізуді жоспарға енгізген. Мысалы, жуырда «Теміржолдағы техникалық қауіпсіздік және еңбек қорғау» тақырыбында кітап көрмесі өткізілсе, Қызылорда магистральдық желі бөлімшесінің «Вокзал шаруашылығы» бөлімінде, «Өндірістік-техникалық» бөлімде, «ЛОИС» және «Жол шаруашылығы» бөлімі қызметкерлеріне ашық ақпарат күні ұйымдастырылып, жаңалықтармен таныстырылған.
Техникалық кітапхананың қызметін әртараптандыру және ақпаратқа сұранысты жедел қанағаттандыру мақсатында қазіргі қолданыстағы ақпарат, ғаламтор жүйесі желілері арқылы «айналым поштасын» кеңейтуді жетілдіріп, сонымен қатар дәстүрлі ұйымдастырылатын ақпарат күні, маман күні, кітап көрмесі және құжат пен кітапты электронды нұсқада жеткізу қызметтерін арттыра түспек. Және де салалық жорналдардың электронды нұсқасын тарату шарасы қолға алынуда.