Жамбылда 200-ден аса теміржолшы денсаулық акциясына қатысты
Өндіріспен тікелей байланысты темір жол саласында еңбек қауіпсіздігін сақтау, оның ішінде адам денсаулығын қорғау басты құндылықтардың бірі болып қала береді. Жамбыл өңірінде жоғарыда аталған құндылықтардың қамымен атқарылып жатқан іс-шаралар еш толастаған емес.
Жуырда дүниежүзілік Денсаулық сақтау күніне орай Жамбыл жүк тасымалы бөлімшесінің кәсіподақ ұйымы мен Жамбыл магистральдық желі бөлімшесі және кәсіподақ ұйымы бірлесіп аталған күннің құрметіне акция өткізді. Оған 200-ден аса теміржолшы қатысып, акция бағдарламасындағы шараларға атсалысты.
Алдымен акцияға қатысушылар Амангелді Байқожаев, Бақыт Мәмбетқұлов және Евгений Тян сынды магистральдық желі бөлімшесінің спорт жөніндегі инструкторларының басшылығымен таңертеңгілік гимнастикалық жаттығуға қатысып, денелерін қыздырып алды. Одан кейін Жамбыл темір жол ауруханасының медбикесі Жанар Кулебаеваның дәрігерлік тексеруіне жүгінді.
– Шараны өткізудегі мақсатымыз – қызметкерлерге жалпы барлық аурулардың алдын алу үшін дұрыс тамақтанудың, дене белсенділігінің маңыздылығы жөнінде ақпараттық насихат жұмыстарын жүргізіп, қандағы холестерин және қант мөлшерін анықтап, бой, салмақ және қан қысымдарын өлшеуді көздедік. Сол арқылы кімнің денсаулығы қай деңгейде екені белгілі болады. Ары қарай әркім өз сырқатына қарай тиісті дәрігерге қаралуы мүмкін. Жұмысбастылықпен көп жағдайда өз денсаулығымызға мән бере бермейміз. Осындай шараларды жиі өткізу арқылы көп аурудың дер кезінде алдын алуға болады. Мәселен осы акцияның арқасында біраз жұмысшылар медбике кеңесі бойынша тиісті дәрігерге жолдама алып жатыр, – дейді Жамбыл жол бөлімшесі жастар ісі жөніндегі өңірлік өкілі Д. Жолдасбаев.
Осы шарадан кейін жамбылдық жас теміржолшылар «Никотинге витамин» акциясына қатысты. Онда олар тиісті маманның темекінің адам ағзасына тигізер зияны мен қоғамдағы қатері жайлы ақпаратын тыңдап, қалтасындағы темекісін қоқысқа тастап орнына алма алды. Акция ұйымдастырушылары никотинге тәуелділерге темекі орнына бір келі жеміс алып жеуге кеңес берді. Шара соңы жастардың көңілді флешмобымен тәмамдалды.
Жасұлан СЕЙІЛХАН