Қазалы станциясында шағын футболдан жарыс өтті
Жастар жылына орай Қызылорда ЖТ бөлімшесі Қазалы станциясында аймақтағы барлық теміржол мекемелерінен жасақталған, кіл жастардан құралған 12 команда қатысқан шағын футболдан жарыс болып өтті.
Қызылорда локомотив пайдалану депосының филиалы Қазалы айналым депосы ұжымы жастарының ұйымдастыруымен спорттық дода станцияның іргесіндегі аудандық стадионда өтіп, оған Қызылорда ЖТ бөлімшесінің директоры Аманкелді Арысбаев, Қазалы вагон пайдалану депосының басшысы Арғын Орымбаев, Қызылорда локомотив пайдалану депосының басшысы Жұлдызбай Мұсаев арнайы барып, жас спортшыларға қолдау білдіріп, жанкүйер болды. Әрдайым салауатты өмір салтын берік ұстанатын бөлімше теміржолшылары, оның ішінде жастар өздерінің кәсіби міндеттерін атқара жүріп, қоғамдық-көпшілік жұмыстарға да белсене араласып келеді. Бүгінгі шара соның айғағы.
– Елбасы Н.Назарбаевтың ағымдағы жылды – «Жастар жылы» деп жариялауына байланысты жастарды қолдау және оларды салауатты өмір салтын ұстануға дағдыландыру мақсатында Қазалы айналым депосында «Спорт пен еңбек – егіз» ұранымен теміржолшы жастардың футболдан ашық турнирі ұйымдастырылуда. Еңбекте өздерінің мықты маман екендіктерін талай мәрте әйгілеген біздің теміржолшы жастар спорттық ойындарда да жұлдызы жанып компания көлеміндегі жарыстарда, аудандық, облыстық ауқымда өткізілетін сайыстарда жүлделі орыннан көрініп жүр. Бүгінгі спорт бәсекесінде де сіздерге сәттілік тілеймін, – деді Аманкелді Арысбаев жарыс жалауын көтерген жастарға қарата.
Өз ұжымдарынан іріктелген кілең жастардан құралған 12 команда футболшылары араларынан ең үздікті анықтау үшін топтық ойынды бастап жіберді... Алғашқы ойын қызылордалық машинистердің ТЧЭ34 құрамасы мен Әскерилендірілген теміржол күзеті жасағының ВЖДО құрамалары арасында өтті. Одан кейін локомотив пен Қамқор-вагон, ЛРЗ-Қазалы мен НОРПож құрамалары арасында қызу ойын өрбіді. Осылайша өз топтарынан ұпай саны, шеберлігі мен ептілігімен ысылған үздіктер бірте-бірте күш алып, ойынның ақырғы айналымына іріктеліп шықты.
Соңында үш команда арасындағы тартысты ойын нәтижесінде жүлделі 3-орын қызылордалық ТЧЭ-34 машинистерінен құралған командаға бұйырды. Жүлделі 2-орынға ЭЧ-26 құрамасы көтерілсе, жүлделі 1-орынды ойынды ұйымдастырушы жергілікті қазалылық машинистердің ТД-23 құрамасы жеңіп алды. Ойында ерекше әдіс-айласымен, командаластарына доппен пас жасау, шабуылды ұйымдастыру жағынан ерекшеленген теміржолшылар да жүлдесіз қалмады. Оларға да арнайы әзірленген сыйлықтар, дипломдар берілді. Мысалы үздік ойыншы ТЧЭ-34 құрамасынан Алексеев Рустам, ВЖДО командасынан Қазбек Аралбай - үздік қорғаушы, үздік қақпашы - ЭЧ-26 құрамасынан Қуантқан Қуаныш, үздік ардагер-ойыншы Жарылқасын Есенов, ТД-23 құрамасынан Әділбек Жұмахметов, Өмірова Дәметкен (футбол ойынын ұйымдастыру жұмыстары үшін) және Ерлан Бимұрат секілді бір команданың үш мүшесіне үздік ұйымдастырушы марапаты беріліп, алғыс айтылды.
Сабырхан СЕЙІЛБЕКҰЛЫ