Атыраудың теміржолшылары қызықты махаббат хикаясына қатысты
Таяуда «Самұрық-Қазына» АҚ «Қозы Көрпеш – Баян сұлу» ғашықтар күніне орай «Ең қызықты махаббат хикаясы» корпоративтік онлайн-конкурсын ұйымдастырған еді. Байқауға «ҚТЖ-Жүк тасымалы» АҚ – Атырау ЖТ бөлімшесінен жас отбасы ретінде Темірхан Аманқұлов пен оның жары Жайна Ерғалиева да қатысты.
Конкурстың негізгі мақсаты – елімізде отбасылық құндылықтарды нығайту, жұмыс пен жеке өмір сабақтастығын күшейту, шынайы сезімді насихаттау. Байқауға қатысушылар отбасылық фотосуреттерін, махаббат тарихын жазып жіберуі керек болатын. Байқау шартына сәйкес интернет қолданушылардың онлайн дауыс беруі арқылы жеңімпаздар анықталды.
Темірхан – Атырау жүк тасымалы бөлімшесінің өндірістік-техникалық бөлім басшысы болса, Жайна – автоматтандырылған басқару жүйесінің диспетчері. Екеуінің де ата-аналары теміржолшылар, бұлар отбасылық династияны жалғастырушылар. Отбасы құрғандарына екі жылдан асты. Махаббат хикаясына келсек, екеуі Ақтөбедегі теміржолшы жастардың жиынында танысыпты. Ол туралы Темірханның өзі әңгімелеп берді. «Сол жылы мамыр айында Ақтөбе қаласында Қазақстан темір жолы кәсіподағының ұйымдастыруымен өткен жастар форумына қатыстым. Шара барысында қарама-қарсы бағытта отырған сұлу қызға көзім түсті. Бір көргеннен ғашық болу мүмкін екеніне сенбейтін едім, алайда, тап сол күннен бастап ойым күрт өзгерді. Дегенмен де, форум аяқталған соң өз жұмыс орным Атырау қаласына оралу қажет болды.Арамызда жүздеген шақырым қашықтық болғанымен де, біздің жүректеріміз бір-бірін іздеп тұрды. Телефон арқылы хат алмасып жүріп, бертін келе бір-бірімізге бауыр басып кеткенімізді, өзіміз де байқамай қалдық. Уақыт өте келе бір-бірімізге сезіміміз арта түсіп, отбасын құруға келістік», – деп күлді отағасы. Олар бүгінде бақытты да жарасымды жұп. Қазіргі таңда 1,5 жастағы Жанерке есімді сүйкімді қыздары өсіп келеді. Байқау нәтижесінде, олар теміржолшылар әулетін жалғастырушы әрі отбасылық дәстүр мен кәсібіне адалдығы үшін Алматы қаласына бір аптаға демалып келуге және ағылшын тілінің тегін курсына қатысуға жіберілмек. «Алға қойған мақсат-арманымыз көп. Сол армандарымыздың бірі, темір жол саласының мықты маманы болып, биік белесінен көріну», – дейді Темірхан мен Жайна.
Қосұйым МҰҚАШЕВ