Идеологиялық қауіптің негізгі дені ғаламтордан төнуде
Семей ЖТ бөлімшесінің ПЧ-39 жол дистанциясында жергілікті теміржолшылардың қалалық ақпараттық-түсіндіру тобымен кездесуі болып өтті. Көпшілік алдында өңірлік дін істері мәселелерін зерттеу орталығының мамандары танымдық тақырыпта баяндамалар жасады.
Жиынға Семей ЖТ бөлімшесінің басшылығы, бөлімшедегі шаруашылық ревизорлары мен жолшылар қауымы қатысты. Бүгінгі күндері идеологиялық қауіптің негізгі дені ғаламтордан төнуде. Тексерілмеген, бұрыс ақпараттарға сену – теріс қадамға бастайды. Осы жайында сөз өрбіткен мамандар діни наным-сенім бостандығы мен қатар, рухани ілім алуға ұмтылу аясында жат пиғылды радикалды діни идеологиялардан сақтану мәселелері төңірегінде келелі әңгіме өрбітті. Сонымен қатар, толеранттылық ұстанымда болудың маңыздылығы мен жастар бойына деструктивті ағымдарға қарсы иммунитет қалыптастыру мәселесіне де тоқталды. Мұнымен қоса, заңсыз миссионерлік әрекеттердің соңы жауапкершілікке әкелетінін де айтып өтті.
– Мұндай келеңсіз көріністер әсіресе теміржол вокзалы аумағында тіркеліп жататыны жасырын емес, – деді мамандар өз сөзінде.
Жалпы, қазіргі күні жақындары деструктивті жат ағымдар ықпалына түскен немесе осы тарапта сұрағы бар тұрғындар үшін арнайы сенім телефоны ашылғаны да айтылып өтіп, аталмыш мәселе төңірегінде мамандар кеңесіне жүгіну ұсынылды.
Жиын соңында басқосуға қатысушы теміржолшылар дәстүрлі дін, діни рәсімдер мен жоралғыларды орындау, жаңадан қабылданған діни қызмет пен діни бірлестіктер жұмыстары жайында түрлі сауалдар қойып, мамандар тарапынан тиісінше жауаптар ала алды.
Қуан ЕРТІС