Қабыл Сафиннің 70 жылдығы аталып өтті
Ақтөбе аймақтық теміржолшы ардагерлер кеңесі төрағасының орынбасары Қабыл Сафиннің 70 жылдығы аталып өтті. Саналы ғұмырын Ақтөбе теміржолының дамуына арнап, қозғалыс саласында еңбек еткен ардагер әлі де белсенді, салауатты өмір салтын ұстанады.
Сондықтан қарт теміржолшыға әріптес інілері «70» деген белгісі бар спорттық форма тарту етті. Және Ақтөбе жүк тасымалы бөлімшесі, магистральдық желі бөлімшесі және әскерилендірілген күзет командаларының арасында волейболдан арнайы турнир ұйымдастырылды. Зейнеттегі теміржолшының мерейтойына арналған спорттық шараға бөлімше басшылары да қатысып, мерейтой иесіне ізгі тілектерін білдірді. «Қабыл ағамыз өмір жолын теміржол саласына арнаған азамат. Әлі күнге дейін жастарға ақылшы, мол тәжірибесімен бөлісіп келеді. Салауатты өмір салтын ұстанып, денешынықтыру жұмыстарымен тұрақты айналысатыны сүйсінтпей қоймайды. Бұрын да басшылық қызметте болған әріптесіміз қазір ардагерлердің арасында да бедел ді, ұйымдастырушылық қабілеті жоғары.
Біз ағамызға мықты денсаулық, отбасына амандық, елімізге тыныштық тілейміз», – дейді Ақтөбе магистральдық желі бөлімшесі басшысының орынбасары Темірғали Көштаев. Зейнетке шыққанына 10 жылға жуықтаса да ардагер теміржолшы әріптестерімен байланысын үзген емес, қайта екі буын арасындағы байланыстың жандана түсуіне атсалысып, түрлі қоғамдық, спорттық шаралардың бел ортасында жүреді. Ардагер мерейтойы құрметіне арналған волейболдан үш команда арасындағы жолдастық кездесу ойдағыдай өтіп, барлық команда сый-сыяпатсыз қалмады. Соңында «Қабыл ағаларын» ортаға алып барлығы естелік суретке түсті.
Ардақ ЕРУБАЕВА