Жеңіс күні қарсаңында семейлік теміржолшылар майдангерлерді құттықтады
Жеңіс күні қарсаңында семейлік теміржолшылар байырғы әріптестері, жергілікті соғыс ардагерлерінің үйлеріне арнайы бас сұғып, мерекемен құттықтады. Қарт жауынгерлерге мерекелік сый-сияпаттарын тарту етті.
Семей байланыс және белгі беру дистанциясының бастығы Бейбіт Түменғали мен осы мекеменің бастауыш ардагерлер ұйымының төрағасы, ардагер теміржолшы Мақсұт Көшжанов ең әуелі қарт майдангер Дмитрий Литвиненконың үйіне келді. Қарт жауынгер меймандарға есікті өзі ашып, әріптестерін қуана қарсы алды.
Өңіріне Қазақстан туы түстес көгілдір жеңіс лентасын таққан, қазақ тілінде жатық сөйлейтін қарттың денсаулығы жақсы, әлі тың екен. Мерекемен құттықтай келген теміржолшыларға соғыс даласында түскен жастық шағындағы фотосуреттерін көрсетіп, қаруластарын, өткен күндерді еске алды.
Дмитрий Лазаревич 1943 жылы 17 жасында соғысқа аттанып, жаяу әскерлер сапында батыс Еуропаны басқыншылардан тазартқан. Майдан даласында-ақ байланысшы болған жауынгер елге оралған соң да теміржол саласында қызмет атқарып, радист болып ұзақ жылдар еңбек етіпті.
Келесі кезектегі сый-сияпат ұсынылған ардагер ШЧ29 мекемесінің байырғы теміржолшысы Кәмкетай Байыров болды. Әдеттегісінше, әріптестерін теңізші формасымен қарсы алған қарт өткен-кеткеннен қозғап, естелік әңгіме шертті. Осындай мереке күндері елепескеріп, құттықтап келетін теміржол саласының басшыларына алғысын да білдірді.
– Мен теміржолға жұмысқа келген жылдары осы салада 2 мыңнан астам майдангер еңбек етуші еді. Бүгінде солардан тек екі адам ғана арамызда жүр, – деп еске алды Мақсұт Көшжанов.
Қуан ЕРТІС