Жүз жасаған майдангер-теміржолшы Бұғыбай Нәрікбаев
Көненің көзіне айналған қарт майдангер-теміржолшы Бұғыбай Нәрікбаев – Сыр өңірінің ғана емес, жалпы ел теміржолшыларының мақтанышы. Соғыс ардагері биыл тоқсанның алтауына толып отыр.
Сұлутөбе топырағында дүниеге келген Бұғыбай қария 1943 жылы әскер қатарына шақырылып, әрі қарай Ұлы Отан соғысына аттаныпты. Бір кездері соғыста болғанын жасырын ақтап, сұлутөбелік Мұстафа Шоқайдың ауылдасы ретінде сол кездегі солақай саясаттың құрығына ілініп, теперіш көрген де сәттері болған деседі...
Қария соғыс жайлы әңгімелеуді онша жақтырмайды. Тек қана Смоленск майданында жаумен бетпе-бет келіп, қиян-кескі ұрысқа қатысқанын кейде айтып отырады екен.
Есесіне өзі жұмыс жасаған жылдары теміржолдың жағдайы, барлық еңбек қол күшімен атқарылғаны, соғыстан кейінгі ауыр жағдайда теміржолда ғана уақытылы берілетін еңбекақыға жан бағуға жетер-жетпес тамақ тауып жеуге мүмкіндік болғанын айтып отырады екен. «Бірақ еңбеккүнді аз төледің деп жұмыстан қалу, жалқаулану біздің ойымызға да кірмейтін, пойызды өзіміз сүйреп жүргізетіндей көріп немесе жұмыстан қалсақ, пойыз жүрмей қалатындай сезініп, жан аямай еңбек еттік», – деп теміржолдағы жұмыстың жауапкершілігі жайлы әңгімелегенді ұнатады екен.
Майданнан оралған Бұғыбай қария Шиелі станциясында еңбек етіп, зейнетке шығады. Кеудесінде «Отан соғысы» ордені мен «Г.К.Жуков медалі», ҰОС жеңісінің мерейтойлық кеуде белгілері жарқыраған қария төрт қыз, үш ұлынан тараған немере-шөберелерінің арасында қамсыз қарттығын кешіп отыр. Ұрпағына соғыссыз бейбіт өмір тілейді.
Азамат ҚҰЛЫМБЕТ