Есенжол Баймұқанов Ауғанстандағы миссия туралы
Есенжол Баймұқанов – ел алдындағы әскери борышын 1980-ші жылдары Кеңестік Қарулы күштер қатарында Ауғанстанда өтеп келген жан. Бүгінде Магистральдық желі дирекциясының Техникалық даму департаментінде 1-дәрежелі менеджер болып жұмыс істейді.
– Мен 8 сыныпты бітіргеннен кейін Целиноград темір жол көлігі техникумына оқуға түсіп, оны «Тиеу жұмыстарының механизациясы» мамандығы бойынша бітіріп шықтым. Техникумнан кейін әскерге шақырылдым. Басында Семейде, сосын Отарда әскери дайындықтан өтіп жаттық, кейін бізді Ауғанмен шекаралас Түркіменстанның Кушка қаласына жіберді. Семейде жүргенімізде Ауғандық бауырлас халыққа интернационалдық көмек көрсетуге келісеміз деп жаздыртып алды. 1979 жылы Ауған жеріне бірінші әскери бекініс орнатылды.
Бізде әскери рота жасақталып, жаяу әскер полкінен, қазақтың жігіттерінен ең үздік 10 механикті іріктеп алды. Мен солардың қатарында болдым. Үш айдай оқу-жаттығудан өткен соң бірден Кандагарға бардық. Шындандағы әскери әуежайды қорғауға алдық. Фарахқа бардық, Ауғанстанның басқа қалаларына да рейдке шығып тұрдық. Ал мені жөндеу ротасына жіберді. Менің міндетім, двигательді, тағысын тағы техникаларға жөндеу жұмыстарын жүргізу болатын. Сондықтан рейдке көп шықпадым. Маджахедтермен болып жатқан соғысқа тойтарыс беру болатын біздің миссиямыз. Алғашқы жылдары олар партизандар сияқты ара-арасында ұрысқа шығып тұрды. Кейін күш алды ғой. Ал біз 1980 жылы елге оралдық, – дейді Есенжол Ешкенұлы.
Елге оралған соң интернационалист-жауынгер өмірін теміржолмен байланыстырып, Ақмола жол дистанциясына жұмысқа тұрыпты. Жол бригадирі, механик-реттеуші, дефектоскоп вагонының инженері, вагон бастығының орынбасары сияқты қызметтерді атқарып, 1997-2001 жылдар аралығында Бас жол басқармасының Ақмола филиалы бойынша жолды диагностикалау орталығын басқарыпты. Ал кейінгі төрт жылда Жол басқармасының жобалық конструкторлық-технологиялық бюроның перспективалы әзірлемелер бюросын басқарып, кейінгі бір жылда Ғылымиөндірістік орталықтың жол шаруашылығын дамыту бөліміне жетекшілік етеді. Соңғы он бес жылдан бері Техникалық даму департаментінде бөлімді басқарып келеді.