Қазақтың батыр қайсар қыздары туралы әңгіме
Ұлы Жеңістің 74 жылдық мерекесі қарсаңында Алматыдағы М.Тынышбаев атындағы Қазақ көлік және коммуникациялар академиясына қарасты Алматы көлік колледжінің акт залында «Батыр апалар ерлігіне – мың тағзым!» атты патриоттық кеш өтті.
Кештің қонағы – колледж директоры Е.Әуесбаевтың арнайы шақыруымен келген М.Тынышбаев атындағы ҚазККА-ның «Автомобильдер, жол техникасы және стандарттау» кафедрасы доценті, Әлия-Мәншүк мұраларын зерттеуші Кеңес Жүсіпов болды.
Кеш басында К.Ә.Жүсіпов қазақтың батыр қыздары Әлия, Мәншүк және Хиуаздың ерлікке толы ерек өмірі, Ұлы Отан соғысындағы көрсеткен ерлігі, туған елге деген зор махаббаты, халқымызға, барлық ұрпаққа үлгі-өнегесі туралы әңгімеледі. Ерлермен бірге қан майданда қаһармандық пен қайсарлықтың қайталанбас үлгісін көрсетіп, өшпестей даңқын қалдырған қазақтың қайсар қыздары Әлия, Мәншүк және Хиуаз әрқашан да құрметтеуге тұрарлық», – деді ол.
Бұдан кейінгі әңгіме желісі академия студенттерінен құралған делегацияның батыр апаларымыз жерленген Ресейдің Псков облысына жасаған сапарлары жайына ауысты. Оның бірі 2010 жылы Ұлы Жеңістің 65 жылдығы қарсаңында ұйымдастырылса, екіншісі 2016 жылы Новосокольники қаласының 115 жылдық мерейтойына орай өткен еді. Баяндамашы студенттерден құралған отрядтың батыр апаларымыздың жерленген жерлері – Ресейдің Псков облысының Новосокольники және Невель қалаларына сапарлары жайында, яғни апаларымыздың бейіттеріне гүл шоқтарын қойып, рухтарына құран бағыштап, тағзым етіп қайтқандары, жергілікті оқушы жастармен, сонымен бірге соғыс және еңбек ардагерлерімен кездесу өткізгендері, әскери даңқ мұражайларын аралағандықтары жайлы, Мәскеудегі Әлия даңғылы бойында орналасқан батыр қыз атындағы мектепте болғандарын бейнесюжеттер мен слайдтар арқылы қызықты әңгімелеп берді.
Биыл Ұлы Жеңістің 74 жылдығы қарсаңында Ресейдің Санкт-Петербор қаласында қазақтың батыр қызы Әлия Молдағұлованың құрметіне арнап жасалған ескерткіш ашылған болатын. Студенттер өздерін қызықтырған жайлар бойынша сұрақтар қойып, сапар иесі оларға жауап берді. Кеш соңында баяндамашы Кеңес Жүсіпов колледж кітапханасына батыр апалар жайлы еліміздің және ресейлік газеттерде жарық көрген материалдарды тарту етті.