Түлкібас станциясының ұжымы футболдан жарысқа қатысты
Түлкібас станциясының ұжымы Дүниежүзілік еңбекті қорғау және Жеңіс күні құрметіне футболдан жарыс өткізді.
Доп додасына Түлкібас станциясынан 2 команда, вагондарды техникалық қарау пунктінен 2 команда, «Әскерилендірілген теміржол күзеті» АҚ Шымкент филиалының Түлкібас атқыштар командасынан 2 команда, ТД-16 машинистерінен құралған 1 команда, жалпы саны 45 адам қатысты. Жергілікті мектептің спорт залында өткен жарыс жанкүйерлері көп болды.
Әрқайсысы өз командаларына дем беріп, қиқулап, ойыншыларды демеп отырғандықтан жарыс өте тартысты да шиеленісті өтті. Сондықтан болар көпшілік үшін күтпеген нәтиже, тосынсыйлар көп болды.
Мысалы, 1 орынды Түлкібас станциясының командасы иеленуі ешкімді таң қалдыра қоймағаны анық, өйткені ә дегеннен ширақ қимылдап көзге түскен станциялықтар жүлделі орын алатыны белгілі еді, бірақ 2 орынды – вагоншылар мен 3 орынды атқыштар командасы иемденуі күтпеген нәтиже болды.
Жарыс соңында жеңімпаздарға сыйлықтар мен кубок, алғыс хаттар табыс етілді.