Болашақ теміржолшылар жаңа мұражайды аралады
«ҚТЖ-ЖТ» АҚ филиалы – Жамбыл жүк тасымалы бөлімшесінің директоры Берік Ақшаловтың арнайы шақыруымен Тараз қаласындағы темір жол көлік және коммуникация колледжінің бір топ студенті Музей күні жуырда ғана бөлімше жанынан ашылған жаңа мұражайды аралады.
Болашақ теміржолшылар сонау ХІХ ғасырдың куәсі болған құнды жәдігерлерден бастап, саланың бүгінгі жетістігіне дейінгі тарихты толық қамтыған мұражай материалдарымен таныса келе, таңданыстарын жасырмады.
– Бізді шақырған азаматтар әр жәдігердің қайдан алынғаны және бүгінде қолданыста жоқ, алайда өз дәуірінің озық жетістігі болған құрал-саймандардың, яғни бүгінгі музей экспонаттарының кезінде қандай мақсатта кәдеге жарағанын барынша түсіндіріп берді, – дейді студенттерге жетекшілік етіп келген колледж музейінің меңгерушісі Гүлжан Құрмантайқызы.
– Біз студенттерге техникалық білім беріп қана қоймай, олардың рухани құндылықтарды бағалап, тарихқа құрметпен қарауға да баулуымыз керек. Ол үшін тәрбиені құр сөзбен айтқанша, осындай музей жұмысы арқылы жеткізсек, анағұрлым өтімді болмақ, – деп санайды бөлімше басшысы Б.Ақшалов.
Ал «Темір жол станциясы кезекшісінің көмекшісі» тобының 2-курс студенті Әділет Тамдығалиев музейден алған әсерімен бөлісіп, теміржолшы мамандығын таңдағанына еш өкінбейтінін, қайта мақтан тұтатынын жеткізді.