Демалыс лагерьге 100 теміржолшы баласына жолдама алып берді
«Қазпрофтранс» ҚБ мен осы бірлестіктің «Астана» торабы филиалы бірігіп, елорда маңындағы ұлттық лагерьге 100 теміржолшы баласына жолдама алып берді.
Осы жылы маусымның ортасында бірінші кезеңін ашатын лагерьде балалар үшін демалыс ерекше жағдайда өтпек. Себебі, Нұр-Сұлтан қаласынан 120 шақырым қашықтықта орналасқан «Nomads Camp» халықаралық деңгейдегі қазақтың киіз үйінде ұйымдастырылған лагерьде балалар таза ауада, табиғат аясында демалып қана қоймай, ұлттық салт-дәстүрді үйреніп, ұлттық тағамдар жасап, ұлттық ойынның қырсырын меңгермек. Лагерьге теміржолшылардың 7-15 жас аралығындағы балалары барады.
– Ұлы даланың салты мен дәстүрлері, қазақтың ырымтыйымдары мен ұлттық ойындары бойынша, сондай-ақ, түрлі рәсімдер, көшпенділер және дала асханасының пайда болуы бойынша шеберлік кластары өтеді. Балалар команда болып жұмыс істеуді үйренеді. Яғни, команда болып бөлініп, ұлттық тағамдар пісіру, атабабаларымыздың жауынгерлік өнері, ұлттық жекпежектерді таныстыру және көрсету, садақ ату, ұлы дала батырлары қолданған қарулармен таныстыру, көшпенділердің кең жазира далада өмір сүру дағдылары, от жағу, су көздерін табу, айдалада келе жатып керекті жеріне бағыт табу, ата-бабалар ізімен «Квест ойыны», қолөнер шеберханасы, қазақы ою-өрнектер мағынасы мен оны жасап көру сияқты жарыстарда бақ сынайтын болады. Көңіл сергітерлік қызықты ойындар арқылы балалар бойына ұлттық құндылықты сіңіру, білімдерін кеңейту – лагерь бағдарламасының басты бағыты. Бұл демалыс балаларға естен кетпес ерекше көңіл-күй сыйлайтынына сенімдіміз, – дейді «Қазпрофтранс» ҚБ «Астана» торабы филиалының төрағасы Серік Сәрсекеев.
Бірегей скауттық бағдарлама бойынша жасақталған лагерьде балалармен әлемнің түрлі елдерінен келген тәжірибелі скаут-нұсқаушылар жұмыс істейтін болады. Сондай-ақ, төрт мезгіл тамақтанатын болады. Лагерьде күзет пен медициналық қызмет және қауіпсіздік толығымен қамтамасыз етілген.