Ақтөбелік теміржолшылар жетімнің баспанасын жөндеуге көмектесті
Ақтөбе облысы бойынша меншікті тілші
Ақтөбелік теміржолшылар ел аумағында жүріп жатқан қайырымдылық шараға үлес қосты. Игі істің басынан Қандыағаш жол дистанциясы және белгі беру және байланыс дистанциясының басшылары табылды.
Қос мекеме директорлары өз қалталарынан қаржы шығарып, қол арбада отыратын жетім өскен жігіттің баспанасына жөндеу жүргізіп берді.
«Біз мұндай істерді көп жария қыла бермейміз. «Қарекет» қорының ұйымдастырушылары өтініш жасағаннан кейін сауапты істен бас тарта алмадық. Оның үстіне көмекке мұқтаж отбасындағы отағасы қоларбада отыратын бірінші топ мүгедегі екен. Қайырымдылық қорымен алынған үйдің едендері тозып кеткен, қабырғалары үгітіліп тұр. Үйдің жағдайын көзімізбен көрдік. Жас отбасының балалары да кішкентай. Екі бөлмелі үйдің ескі еденін ауыстырып, үйді жаңадан жаңғыртып бердік. Күні кеше жергілікті билік отбасыға баспананың кілтін табыстады», – дейді Қандыағаш жол дистанциясының басшысы Ербол Сәулебеков.
Ұжымның қайырымдылық шараларына атсалысуы алғаш рет емес. Өткен жылы теміржолшылар Қандыағашта тұратын жетім қыздың есепшотына 300 мың теңгеге жуық қаржы аударған. Ақтөбедегі көктемгі су тасқыны кезінде далада қалған көпбалалы отбасыға баспана тұрғызып берген де осы Қандыағаш станциясының теміржолшылары болатын.