«Мен – теміржолшымын!» акциясына үн қос
«Қазақстан теміржолшысы» газетінің тілшісі
Ақмола теміржолшылары Арыс қаласының зардап шеккен тұрғындарына қолдау көрсету мақсатындағы жалпы республикалық қайырымдылық акциясына қосылып отыр.
Ақмола өңірінің теміржолшылары Түркістан облысының Арыс қаласы тұрғындарына қайырымдылық көмек көрсету үшін «Мен – теміржолшымын!» әлеуметтік акциясына бастамашылдық жасады. Арыс қаласы тұрғындарының басым бөлігі теміржолшылар екенін ескерсек, ақмолалықтар әріптестеріне қолдан келген көмектерін көрсетуге ұсыныс тастап, жапа шегушілер мекенжайына біркүндік жалақыларын аударуға шешім қабылдады.
«Жалпы теміржол саласы еңбеккерлері елімізде болған түрлі төтенше оқиғалар салдарынан зардап шеккен елжұртқа қашанда қолұшын беріп, қалыс қалған емес. Бұл жолы да Ақмола жүк тасымалы және магистральдық желі бөлімшелерінде және филиалдарында еңбек ететін қызметкерлер өз еріктерімен көмектесуге ықылас танытты. Өңірдің басшысы ретінде аймақ теміржолшыларын, үлкен алғыс айтамын. Және де біздің бастамамызды өзге өңірлердегі әріптестеріміз қолдайтынына сенімдіміз», – деп ой бөлісті Ақмола ЖТ бөлімшесі басшысы Нұрым Жаниязов.