Теміржолшылар #Birge #TazaQazaqstan экологиялық акциясына қатысты
Достық станциясының ұжымы төл мереке қарсаңында республика көлемінде кең қанат жайған «Таза Қазақстан» экологиялық акциясы аясында сенбілікке шықты.
«ҚТЖ-Жүк тасымалы» АҚ «Достық» аймақтық телімі филиалының өндірістік қауіпсіздік және экология секторының бастығы Батыржан Ахметжановтың айтуынша, аталған акцияға вагон қараушылармен бірге станцияның 110 қызметкері жұмылдырылған.
– Республикалық деңгейде ұйымдастырылып жатқан акциядан Достық станциясының теміржолшылары да тыс қалмай, маңызды шараға атсалысуда. Станция аумағында өткен сенбілікте біз өзімізге бекітілген көшелерді қоқыстан тазартып, ағаштардың түптерін әктедік. Атап айтқанда, Молдағұлова, Бәкірова көшелері мен станция әкімшілігінің ғимараты аумағы тазаланды. «Жұмыла көтерген жүк жеңіл» демекші, барлық қызметкерлер бір адамдай тазалау жұмысын жүргізді, – дейді ол.
Ел болып кірісіп жатқан сенбіліктерге теміржолшылар бір адамдай ұйымшылдықпен атсалысып, Достық станциясында олар 400 келідей қоқысты тазалап, шығарған. Достық тазарту мекемесінің тракторы мен камазы сол қоқыстарды станция сыртына апарып төккен.