Теміржолшылардан материалдық көмек берілмек
Қызылорда облысы бойынша меншікті тілші
Теміржолшыларды әлеуметтік тұрғыдан қолдау мақсатында Ұлттық компанияда кешенді бағдарламалар ұйымдастырылып, оның игілігін сала еңбеккерлері көріп келеді. Соның бірі – теміржолшылардың балаларын мектепке дайындауға көмек.
Жыл сайын жүргізілетін бұл жұмыс биыл да жалғасын тауып, осы игілікті шара барысында Қызылорда ЖТ бөлімшесінде жұмыс жасайтын 500-ден аса теміржолшы отбасының 900-ден аса бүлдіршіні қамтылмақ. Бөлімшенің персоналмен жұмыс бөлімінің маманы Шамшагүл Алпысбаева қазіргі таңда теміржолшылар арасынан әлеуметтік көмек алуға қатысты құжаттар ретке келтіріліп, әзірлік жұмыстары аяқталғанын жеткізді.
– Биыл Отбасы күніне берілетін көмек балалардың сабаққа баратын Білім күні қарсаңында берілмекші. Осыған орай әлеуметтік көмек алатын 299 теміржолшы отбасына тиісті құжаттар дайындалып, есебі әзірленді. Яғни 1 қыркүйек – Білім күні қарсаңында Қызылорда ЖТ бөлімшесінің теміржолшылары мен бөлімшеге қарасты Қазалы вагон пайдалану депосы, Қызылорда және Сексеуіл локомотив пайдалану деполарында жұмыс жасайтын еңбеккерлердің отбасында 3 және одан да көп баласы барлар, жалғызбасты аналар, толық емес отбасыларға 2 АЕК көлемінде және отбасында 18 жасқа толмаған 4 бала немесе мүгедек бала болса, 4 АЕК көлемінде әлеуметтік көмек көрсетіледі, – деді Шамшагүл Алпысбаева.
Сонымен қатар осындай көмек отбасы санатына байланысты, әлеуметтік жағдайына қарай Қызылорда магистральдық желі бөлімшесіне қарасты теміржол мекемелерінен де 103 теміржолшы отбасының бүлдіршіндеріне берілмек.