Теміржолшылар «Мектепке жол» акциясына белсене қатысқалы отыр

Жалпы түбек теміржолшылары балаларға қуаныш сыйлау іс-шараларынан қалыс қалған емес. Биыл да дәстүрлі «Мектепке жол» республикалық акциясына белсене қатысқалы отыр. 

Осы жылы Маңғыстау жүк тасымалы бөлімшесі Мұнайлы ауданындағы 50 оқушыны жаңа оқу жылына дайындауды мойнына алған. Бұл – аудандық білім бөлімінен айтылған ұсынысқа орай белгіленген меже. Қазір аталған қайырымдылықтың қаражаты қарастырылып, мекемелер әзірлік шараларына кіріскен. Одан бөлек мекеме қызметкерлері өз араларында да акцияға қатысуды бастаған. Мысалы, Болашақ станциясының жолшылары ауылдағы бір ананың балаларын жаңа оқу жылына дайындауға атсалысқан. Екі баласы мектепте оқитын жалғызбасты анаға қаржылай көмектесіпті.

− Акция аясында біз аудандық білім бөлімінен №13 мектеп-гимназиясы мен №1 орта мектептің 50 баласын мектепке қажетті құрал-жабдықпен қамтуға міндеттеме алдық. Оларды өзімізге қарайтын мекемелерге бөліп тастадық. Осы аптада қай мекеменің қалай жұмыс жасағаны белгілі болады. Балаларға арнап сатып алған тауарларымызды мектептерге жеткізіп береміз. Білім ордасы басшылығының өздері тапсыратын болады, – дейді кадрлар бөлімінің бастығы Екпін Қожахметов.

Оның айтуынша, Маңғыстау теміржолшыларының балалары жазғы демалысын да қызықты өткізген. 300-ге жуық бала Ақтау қаласындағы «Балдәурен», Жаңаөзен қаласындағы «Кендірлі» демалыс орнында болып қайтқан.