Семейлік теміржолшылардың балаларың мектепке жинады
Абай облысы бойынша меншікті тілші
1 қыркүйек – Білім күніне орай Семей ЖТ бөлімшесі жергілікті теміржолшылардың балаларына мектепке қажетті жабдықтар мен оқу құралдарын тарту етті.
Бөлімше басшысы Марлен Көкірекбаев 1 сынып табалдырығын алғаш аттағалы отырған балақайларға оқуда табыс тілеп, оларды және олардың ата-аналарын келе жатқан Білім күнімен құттықтады.
Кәсіподақ ұйымы мұрындық болған шараға желі бойындағы барлық қызметкерлердің отбасылары толық қамтылған. Оларға оқу құралдары толы оқушылар сөмкелері табыс етілді.
– Биылғы жылы арнайы тізім бойынша тек жүк тасымалы бойынша 180 баланы қамтыдық. Негізгі назар биыл мектеп табалдырығын аттайтын бүлдіршіндерге берілді. Жалпы, акция аптаның дүйсенбісінен бастау алған болатын. Ол барлық станцияларда жалғасып, балаларға үлестіріледі, – дейді Семей ЖТ бөлімшесі кәсіподақ ұйымының төрағасы Асхат Жармұхаметов.
Семей теміржолы бойынша жалпы саны 300-дің үстінде бірінші сыныпқа баратын бүлдіршіндер Білім күніне базарлық алып отыр екен.