«Денсаулық» пойызының дәрігерлері қорытынды жасады
«Денсаулық» медициналық пойызының дәрігерлері Батыс Қазақстан облысы бойынша жүргізілген жұмыстарын қорытындылады.
Бұл өңірдегі 9 шалғай станцияны аралап, халыққа тегін медициналық-диагностикалық қызмет көрсеткен олар сол аралықта онкологиялық ауру белгілері бар азаматтарды да анықтаған.
Аталған пойызда осы өңірдің 3733 тұрғыны қаралған, оның ішінде 134 бала бар. Халық терапевт дәрігерлерге бәрінен көп қаралған, яғни 530 тексеру болған. Сонымен қатар 426 адам офтальмологтан, 413 пациент тіс дәрігерінен тексеруден өткен. Тұрғындардың бірі Татьяна Берхееваның айтуынша, бұл медициналық пойыз жергілікті халық үшін құтқарушы десе де болғандай. Себебі олардың қалаға баруға жағдайы да, көлігі де бола бермейді. Сондықтан жылда бір рет келетін медициналық пойыз қызметіне олар әбден үйренген.
«Денсаулық» медициналық пойызы 29 сәуірде жолға шыққан, 21 желтоқсанға дейін жұмыс істейді. Олар шамамен 60 мыңнан астам адамды медициналық тексерістен өткізуді жоспарлап отыр.
Жалпы, «Медициналық пойыздар» жобасы алғаш рет 2010 жылы іске қосылған. Осы уақыт ішінде консультациялық-диагностикалық пойыздарда еліміздің барлық облыстарынан 1326 станция тұрғындары тексеруден өтті. Мамандар 379 000 қазақстандықты тексерістен өткізді, оның 83 806-і – балалар. Дәрігерлік қабылдаулардың жалпы саны шамамен 2,5 млн құрады.
Жобаны «Самұрық-Қазына» АҚ компаниялар тобы атынан «Samruk-Kazyna Trust» әлеуметтік жобаларды дамыту қоры және ҚР Денсаулық министрлігі, сонымен қатар «Қазақстан темір жолы» ҰК» АҚ-ның «Әлеуметтік жобалар» Корпоративтік қоры жүзеге асырады.