«Маңғыстау.КЗ» жігіттері жарап тұр
Жастар жылында маңғыстаулық теміржол жастары жыл басында уәде еткендеріндей жұмыста да, жұмыстан тыс уақытта да белсенділіктерімен көзге түсуде. Мәселен, аймақ теміржолының түрлі мекемесінде еңбек ететін жас жігіттерден құралған «Маңғыстау.кз» жайдарман құрамасы көптің ықыласына бөленіп жүр.
Олар қай жарысқа барса да олжасыз оралмайды. Алысқа ұзамайақ қояйық, осы жаз айларында жігіттер біраз жетістіктерімен жерлестерін қуантты. Жастар күніне орай тамыз айының бірінші жартысында республикалық «Жайдарман» ойынының жазғы фестиваліне ҚТЖ атынан шақырту алып, астаналықтарға теміржолшылардың өнерін танытып, зор қошеметке бөленіп қайтты. Мамыр айында Жайдарман Алматы «А» лигасында жартылай финалға жолдама алып келді. X корпоративті жастар лагерінің мерейтойлы сессиясына барып көңілді тапқырлар ойынының батысаралық лигасында біріншіліктен көрінді. «Аймақтар визиткасынан» екінші орынды еншіледі. Рамазан айында қайырымдылық іс-шараларына ұйытқы болып, олардың бастамасымен аз қамтылған отбасыларға азықтүлік тауарлары жеткізіп берілді.
− Біздің теміржолда жастар саясатына жақсы көңіл бөлінеді. Жастар жылында біраз жұмыстарды жүзеге асырдық. Нәтиже жаман емес. Негізінде қазыналы Маңғыстау жерінде өнерлілер көп, теміржолда да «сегіз қырлы, бір сырлы» жігіттер аз емес. Биыл командамыз сондай бір жігітпен толықты. Сай-Өтес станциясының операторы Дарын деген әріптесімізді қатарымызға қостық. Тобымыздың мүшесі Ғалымжан Жексенов биыл басшылықтың Алғыс хатын алды. Ержан Ниязқұлов «ҚТЖ Стар» ән байқауынан бірінші орынды иеленді. Енді командамыз қыркүйектің 13-14 күндері өтетін аймақтық форумға дайындалуда, – дейді теміржол жастарының Маңғыстаудағы өкілі Қуатбек Көпбаев.