ҚТЖ-ның қызметкерлері «ПиР-2019» фестиваліне қатысты
Қазақстан темір жолының бір топ қызметкерлері жыл сайын ұйымдастырылатын «ПиР-2019. Даму практикасы» фестиваліне қатысып, білім-біліктерін жетілдіріп қайтты.
Осы жылы 12-15 қыркүйек аралығында Ресейде өткен шара осымен сегізінші жыл әлемнің мыңнан астам кәсіпкерлері, бизнесмендері, HR мамандары, әлеуметтанушылары, бизнес-кеңесшілері, бизнес жаттықтырушылары және оқыту мен персоналды дамыту бойынша мамандардың басын қосты. Биылғы фестиваль тақырыбы «Кім маңызды?» деп аталды. Сонымен қатар әр күннің өз атаулары болды. Атап айтқанда, бірінші күнгі тақырып «Кім маңызды: Өмір жолы» деп аталса, екінші күні «Кім маңызды: Қызмет жолы», үшінші күні «Кім маңызды: Компания мен қоғамдастық жолы» және соңғы күні «Кім маңызды: Әлем жолы» деген тақырыптар барлық шараларға арқау болды. Төрт күн болған шара аясында 400-ге жуық шеберлік кластары өткізілді.
Шараға Қазақстан темір жолынан қатысушылардың бірі, «ҚТЖ» ҰК» АҚ Адами ресурстарды басқару департаментінің бас менеджері Ақмарал Байғабылованың айтуынша, компанияның Орталық аппаратынан фестивальге қатысу үшін 45 қызметкер байқаудан өткен. Олар жаз бойы 3 модуль бойынша оқытылған. Фестивальдің Қазақстандағы ұйымдастырушылары солардың арасынан 5 жаттықтырушыны іріктеп алыпты.
– Біз ішкі жаттықтырушылар деп аталамыз. Яғни, мұнда жеке басты дамытуға бағытталған бағдарламаларға қатысамыз. Ұлттық компаниядан Алма Сәулебекова, Жанбота Шакиров бастаған бес қызметкер Ресейде өтетін биылғы фестивальге қатысуға жолдама алып, білім көкжиегімізді кеңітіп қайттық. Таңғы 10-нан кешкі 23.00ге дейін біз түрлі тақырыптардағы шеберлік кластарға қатыстық. Олардың бағыттары сан алуан, мәселен, шешендік өнерді жетілдіру, қоғаммен байланыс, адамдармен тіл табысу қасиеттерін дамыту, көпшілік алдында сөйлей білу, корпоративтік басқару және тағы да басқа көптеген тақырыптарда өрбіді. Енді сол алған білім, үйренген машықтарымызды компания көлемінде өтетін барлық шараларда әріптестерімізге үйрететін, жеткізетін боламыз, – дейді бас менеджер.