Бас ревизорлар Қазақстанның киелі жерлеріне барды
Абай облысы бойынша меншікті тілші
Өткен апта соңында Семей ЖТ бөлімшесінде ұйым-дастырылған екі күндік семинар-кеңеске жиналған барлық бөлімшелердің бас ревизорлары шаһардың тарихи орындарымен танысып, өңірдегі рухани-мәдени мұраларға да қанықты. Елбасының бастамасымен қолға алынған «Рухани жаңғыру» бағдарламасына сай «Қазақстанның киелі жерлері» географиясына енген бірқатар қастерлі орындарда да болды.
Алғашқы кезекте меймандар екі ғасырға жуық тарихы бар Абай атындағы облыстық кітапханадағы Абайдың 175 жылдығына орай ұйымдастырылған көрме залдарын тамашалады. Ондағы хакім Абай заманындағы туындыларға, олардың өткен шежіресіне қанықты. Бұл мәдени орынға заманында Абай Құнанбайұлының өзі тұрақты оқырман болыпты.
Рухани тағылыммен басталған шара семинар-кеңес аяқталған күннің ертеңгісін Абайдың әдеби-мемориалды қорық мұражайына сапармен жалғасты. Бұл ретте Семей ЖТ бөлімшесінің бас ревизоры Сайлау Юсупов Ұлы Абайдың 175 жылдығына арнап, меймандар үшін шағын кітапша құрастырып, әріптестеріне сыйға тартқан болатын. Жол-жөнекей «ұлт энциклопедиясы» саналар «Абай жолы» романэпопеясына арқау болған тарихи орындармен де әдебиет пен тарихқа қанық Сайлау Түсіпұлы өзі таныстырып отырды.
Осылайша, Абай жүрген жолмен «жыр Меккесі» саналар Жидебайға жол тартқан қонақтар жолшыбай Мұхтар Әуезовтің көркем шығармаларына арқау болған бірқатар орындарда болды. Атап айтсақ, «Қорғансыздың күніндегі» Ғазиза су ішкен Күшікбай бұлағы, Көксерек оқиғасы орын алған Сырт Қасқабұлақ, Еңлік пен Кебек жазаға тартылған Ералы жазығы, Құнанбай мен оның ұлдары жерленген Абайдың қыстауы, Ақшоқы сынды тарихи орындарға табан тіреп, тарихымен танысты. М.Әуезовтің туған жері Бөрілідегі ұлы жазушы өмірге келген мұражай-үйін аралады.
Еуразия кіндігі саналатын Жидебайдағы Абайдың өзі салдырған үйде, қазіргі мұражайда әсерлі сәттер мол болды. Хакімнің өзі тұтынған, заманында Семейдегі географиялық қоғамға этнографиялық жәдігерлер ретінде өзі өткізген заттарды ұстап көріп, шежіресіне қаныққан қонақтар естелік суретке түсті. Сондай-ақ, Жидебайдағы Абай мен Шәкәрім кесенесіне де зиярат етті.
Аталмыш шара бөлімше басшысы Марлен Көкірекбаевтың, бөлімшенің бас ревизоры Сайлау Түсіпұлының бастамасымен ұйымдастырылған болатын. Ұлт руханиятының қайнары саналатын қастерлі өлке Жидебайға сапар, Абай жолымен жүріп, рухани тағылымына қанығу меймандар үшін үлкен сый болғаны анық.