«Денсаулық» пойызы – болашақта
Шалғай елді мекендерге дейін барып, жергілікті халыққа медициналық қызмет көрсететін пойыздарға ел адамдары үйреніп алғаны сонша, оның әр сапарын асыға күтеді. Ауырыпсырқаған жандар «қызыл пойыз» келсе қаралатын деп күнібұрын жоспарлап жүреді.
Батыс өңірін аралап жүрген «Денсаулық» пойызы өткен аптада Маңғыстаудың Болашақ станциясына келіп жетті. Кешке келген қызыл пойыздың хабары алыс-жақынға сол кеште-ақ тарап, таңнан кезекке тұрғандар қарасы қалың болды. Сағат сегізден бастап медициналық пойыздың есігі айқара ашылып, дәрігерлер қабылдауы басталды. Халықтың жоғары белсенділігін бағалаған ақ халаттылар да риза болып, болашақтық пациенттеріне кешкі сағат алтыға дейін, түскі үзіліссіз қызмет көрсетті. Жергілікті халық, шекаралық станция тұрғындары әсіресе педиатр, терапевт, гинеколог, уролог, окулист, кардиолог мамандәрігерлер қызметіне көп жүгінді. ЭКГ, рентген құрылғыларынан 150 адам тексеруден өтіп, талай адам дертіне шипа болар кеңес алды. Балалар дәрігерінің өзі 45 бүлдіршінді тексеруден өткізді.
− Болашақ станциясына «Денсаулық» пойызы 4-5 рет келді. Халық оны ылғи да асыға күтеді. Мұндай медициналық пойыз болашақтықтарға өте қажет. Себебі ауырыпсырқаған тұрғын медициналық ем алуға Жаңаөзен қаласына баруына тура келеді. Оған жететін автожол жоқ. Теміржолмен жүруге қалаға қатынайтын пойыз белгілі кестемен ғана қатынайды. Онымен барса – 3 сағат, машинамен 4 сағаттай уақыт жұмсайды. Емханадағы кезек күту, басқа дәрігерге жіберуі бар, талдау жасатса, оның қорытындысын алу керек дегендей, сонымен біраз уақыты, қаражаты кетеді. Өзіміздің ауылдағы амбулаториялық кабинетте тек бір медбике жұмыс істейді. Дәрігерге штат ашуға норматив бойынша халық саны 2 мыңға жетпейінше болмайды екен. Бізде бар-жоғы 600-ге жуық адам тіркеуде тұрады. Ал оларға ауыру тағы «тиімсіз». Қаладан «Жедел жәрдем» көлігі келгенше сағаттап уақыт кетеді. Осындай жағдайлардан, яғни ауруын асқындырып алып, дер кезінде дәрігер көмегіне жете алмай соңғы жылдары бірнеше адам қайтыс болды. Сондықтан «өз аяғымен» келіп тұрған дайын дәрігерлерге көрініп денсаулығын тексеріп, кілтипаны болса, ем-домын алдын ала алып дегендей, адамдар денсаулығын сақтауына «Денсаулық» сынды медициалық пойыздар әсері мол болмақ, – дейді. Болашақ станциясының бастығы Мақсат Нұрбеков.
Келесі күні «Денсаулық» пойызын Тассай станциясына шығарып салған станция тұрғындары енді қыста келетін «Жәрдем» пойызын да асыға күтетін болады. Ендеше, «Жәрдем» жеткенше болашақтықтардың басы ауырып, балтыры сыздамасын деп тілейік...