Тағы бір сәби пойызда туылды
Аяғы ауыр келіншектердің пойызда босануы үрдіске айналғандай ма қалай... Өткен аптада тағы бір сәбидің кіндігі пойызда кесілді. Жол үстінде толғағы келген келіншектің бақытына жолаушылар арасынан нағыз маман дәрігерлер табылған.
Бұл жолы «Ақтөбе-Алматы-1» бағытындағы №34/33 жолаушылар пойызы бригадасының бастығы Сағынай Жүсіпке 24 қазан күні Шу станциясының тұсында №5 вагон жолсерігі Руслан Байекешов толғағы қысқан әйелге медициналық көмек керек екенін хабарлаған. «22 қазан күні Ақтөбеден шықтық. Шу қаласынан қозғалып кеткеннен кейін жолаушылар арасында жас келіншектің толғатқанын естіп, шұғыл Отар станциясынан жедел жәрдем шақырып, жағдайды хабарладым. Біз адамның денсаулығына қатысты кез келген жағдайда жедел жәрдем шақырамыз. Дәрігерге хабар беру – менің міндетім. Машинистпен радиобайланыс тек менде ғана. Өзім келіншек келе жатқан вагонға жүгірдім. №7 вагонның жолсерігі Айгүл Қалиеваны қасыма ертіп алдым. Ол келіп бірден терезелерді ашып, басқаларын сыртқа шығарып, босанып қалса қажет болатын анау-мынауын дайындай бастады. Жанұшыра вагон жағалап, дәрігер іздедік. Абырой болғанда сол вагондағы бірінші купеде Алматыдағы кардиологиялық орталықта терапевт болып жұмыс істейтін жігіт келе жатыр екен. Ол естігенде бірден толғатып жатқан әйелге көмектесуге кірісіп кетті. Осылай абыр-сабыр болып жатқанымызда №9 вагоннан зейнеттегі акушер-ги неколог апа жетті жүгіріп. Бағымыз болар, осылай облыстық дәрігерлер Алматыға жіберген келіншекті аман-есен босандырып алдық. Өзіміз де әбден абдырадық. Ең бастысы ана мен бала аман! –деп баяндап берді сол кездегі жағдайды пойыз бастығы Сағынай Жүсіпов. Т
олғақ қысқан18 жастағы келіншектің бұл тұңғышы екен. Квотамен Алматы қаласында босануға бара жатқан беті екен. Осылайша пойыз бригадасының ұйымшылдықпен сауатты әрекет етуі және кәсіби дәрігерлердің арқасында дүниеге аман-есен қыз бала келді. Отар станциясында жас босанған Алтынай Темір сәбиімен бірге жедел жәрдем дәрігерлеріне табыс етілді. Айта кетерлігі, «Жолаушылар тасымалы» АҚ жолсеріктерді ұдайы алғашқы медициналық көмек көрсету және төтенше жағдайлардағы әрекеттер бойынша оқытып отыруының бір пайдасы осы дер едік. Компания өз атынан жол үстінде толғағы келген әйелге қол ұшын созған жолаушылар – дәрігер Евгений Колопилов пен акушер Бейбіткүл Құмғанбаеваға және де вагон жолсерігі Руслан Байекешов пен пойыз басшысы Сағынай Жүсіпке алғысын білдіреді. Еске сала кетсек, осыдан бір ай бұрын «Қызылорда – Нұр-Сұлтан-Нұрлы жол» бағытындағы №91 пойызда да Г.Жолдас есімді жолаушы келіншек жолда босанып, пойыз бастығының құрметіне қызына Меруерт деп ат қойған еді.