Түркістан облысына «Денсаулық» медициналық пойызы келді
Шымкент қаласы бойынша меншікті тілшісі
Түркістан облысына «Денсаулық» медициналық пойызы келді. Қазақстанның шалғай жатқан теміржол станцияларына аялдайтын пойыздың сапары биылғы жылдың 21 желтоқсанында аяқталады. 240 күн ішінде теміржол бойындағы елді мекендер тұрғындарына шамамен 230 млн теңгенің қызметі көрсетілуі жоспарланған.
Медициналық пойызда көрсетілетін қызметтерді «Әлеуметтік медициналық сақтандыру қоры» коммерциялық емес АҚ тарапы қаржыландырады. Дәстүрлі жобаны «Қазақстан темір жолы» ҰК» АҚ мен «Samruk-Kazyna Trust» әлеуметтік жобаларды дамыту қоры бірлесіп жүзеге асыруда. Сегіз облысты аралап, 195 станцияға аялдауды, барлығы 40 мыңға жуық адамға медициналық көмек көрсетуді жоспарлап отырған жылжымалы емхана қызметін ел аймақтары халқы асыға күтуді дәстүрге айналдырған. Түркістан облысының халқы да жұмысын 5 қарашадан бастаған, ел аузында «қызыл пойыз» атанып кеткен денсаулық құрамын қуана қарсы алды.
Соңғы үлгідегі қондырғылармен жабдықталған пойыздарда көрсетілетін медициналық көмек тізімінде: салалық мамандардың кеңесі (терапевт, педиатр, невропатолог, окулист, ЛОР, гинеколог, хирург, уролог, маммолог, онколог, т.б.), түрлі зерттеулер мен диагностика түрлері (УДЗ, қан талдаулары, флюорография, т.б.), кішігірім хирургиялық операциялар мен стоматологиялық қызметтер және тағы басқалары бар.
«Биыл денсаулық саласы қызметкерлерімен бірге Медициналық сақтандыру қоры қызметкерлері де жолға шығып, әр станцияға тоқтап, ондағы тұрғындарға міндетті әлеуметтік медициналық сақтандыру жүйесі жайлы жан-жақты мәлімет бе руі жоспарланған. Себебі, бұл – Қазақстандағы әрбір тұрғынға қатысы бар маңызды реформа. Сондықтан да Қор азаматтардың сақтандыруға қатысты сұрақтарына жауап беретін нүктелер санын арттырып, консультацияларды жетілдіре түсуге ден қойып отыр», – дейді қордың өкілдері.
«Денсаулық» медициналық пойызы Түркістан өңірінде қарашаның соңына дейін болып, алдымен Отырар ауданы, Темір, Қарақоңыр, Талдықұдық станциясына, Арыс пен Шағыр станциясына аялдап, одан әрі Монтайтас, Шанақ, Шеңгелді Сарыағаш, Жылға, Дарбаза станцияларын аралайды. Ордабасы ауданы, Қалаш станциясында, Бадам мен Игілік станциясына, Сайрам ауданының Қызылсай, Ынтымақ станцияларына, Түлкібас ауданының Састөбе, Көктерек, Түлкібас станцияларында аялдап, медициналық қызмет көрсететін болады.