Вокзал кезекшісінің жеңісі
«Жүз жас есім» жобасына өткен теміржолшылардың бірі - Қостанай магистральдық желі бөлімшесі ДС-2 вокзал бастығының көмекші кезекшісі Айнагүл Ақдәулетова. Ол персоналмен жұмыс жасау бағытында үздік болып танылды.
Вокзалға 19 жасында қызметке келген жас теміржолшы 13 жылдан бері осы көпшілікпен бетпе-бет келетін сервис саласындағы қызметін атқарып келеді. Бұл форумға екінші рет қатысып отыр. Қоғамдық шаралар белсендісі. Би билеп, домбыра шертеді. Байқауларға қатысады. Салада алған марапаттары жетерлік. Ұлы жеңіс күніне орай 9 мамырда волонтерлік іспен айналысады.
– Халықпен жұмыс істегесін күн сайын түрлі қиын жағдайлар болып жатады. Мысалы, кассадағы кезек күту, билет қайтару мәселесі де өзекті. Әсіресе, соңғы енгізілген жаңашылдықтар бойынша кемшіліктер болды. Кешкі жетіде болса пойыз кетпей тұрып немесе кеткеннен кейін 40 минут ішінде тапсыруы керек. Сондай мәселелерді шешуде өз ұсыныстарымды айттым. Осы орайда жолаушыларға қызмет көрсету сапасын жақсарту туралы ойларымды басшылыққа жеткіздім, компания табысын арттыруға ықпалы зор болғандықтан осы ұсынысым қолдау тапты. «Жүз жас есім» жобасына өзімді ұсынып, барлық талаптарын орындадым, сөйтіп жобаға өттім, – дейді ол.
Нағашылары жағынан үшінші буын теміржол өкілі болып табылатын оның бауырлары да осы салада. Ауысымдық қызметінде тек өз жұмысынан бөлек вокзал іші мен аумағындағы қауіпсіздікті жауапкершілігіне алады. Сондай түнгі ауысымдарда түрлі қиын жағдайларға душар болған жандарға шарапаты тиген Айнагүл алғысқа бөленіп жүрген қызметкерлердің бірі. Өз мамандығын да, адамдарды да жақсы көретін теміржолшы арудың алар асулары алда.