Теміржолшы Аягөздің құрметті азаматы атанды
Абай облысы бойынша меншікті тілші
«Қазақстан темір жолы» ҰК» АҚ Басқарма басшысының жанындағы консультативтік кеңестің тұрақты мүшесі, Семей ЖТ бөлімшесі бойынша ардагерлер кеңесінің төрағасы, Құрметті теміржолшы Қырықбай Әлсейітов «Аягөз ауданының Құрметті азаматы» атанды.
Теміржолшылар қаласы саналатын Аягөз шаһарынан арнайы келген жергілікті әкімдік өкілдері Қырықбай Әлсейітұлына құрмет көрсетіп, салтанатты жиында «Аягөз ауданының Құрметті азаматы» төсбелгісін тақты.
Алғашқы еңбек жолын Аягөз локомотив депосында, бүгінгі ТЧЭ-25 мекемесінде бастаған ардагер ерен еңбегінің арқасында еліміздің бірқатар аймағында тепловоз пайдалану деполарының директоры, бөлімшенің бас инженері дәрежесіне дейін өскен.
Аягөз ауданының әкімі Ділдабек Оразбаев ардагердің Аягөз өңірін дамытуға қосқан үлесін ескеріп, аудандық мәслихаттың шешімімен мұндай құрметке лайық деп танығандарын жеткізіп, тарлан теміржолшының өңіріне төсбелгіні өз қолымен тақты.
– Даңқты теміржолшылар ұстаханасы саналатын Аягөз локомотив пайдалану депосында еңбек еткен жылдары Қырықбай Әлсейітұлы өңірдегі теміржол саласының өркендеуіне зор үлес қосты. Әсіресе, шәкірттер даярлап, ұлттық кадрлар әзірлеуде еңбегі ерек. Қырықбай ағамыздың тәлімін көрген білікті теміржолшылардың көпшілігі бүгінде еліміздің әр түкпірінде локомотив пайдалану деполарын басқарып, тіпті ұлттық компанияның орталық аппаратында да лауазымды қызметтерде қызмет етіп жүр, – дейді ақиық ардагер жайында пікір білдірген Семей ЖТ бөлімшесінің кәсіподақ комитетінің төрағасы Асхат Жармұхаметов.
Айта кетсек, осыған дейін Шар қаласының Құрметті азаматы атағын алған Қырықбай Әлсейітұлы 84 жасқа аяқ басса да аттан түскен жоқ. Бүгінде Семей теміржолының ардагерлер кеңесін басқарып, қоғамдық жұмыстың белортасында, кейінгі буынға ақылшы болып жүр.