Шаңырағына шашу шашты
Ақтөбе облысы бойынша меншікті тілші
Ақтөбелік теміржолшылар тағы бір игі іске мұрындық болды. Жергілікті әкімдікпен баспана алған балалар үйінің түлегін Қандыағаш вагон депосының ұжымы шынайы ықыласпен құттықтап барды.
Қандыағаш вагон депосының басшысы Еркін Жананбаев пен кәсіподақ төрағасы Азамат Мыңжасаров бастаған ұжым мүшелері жетім баланың шаңырағына шашу шашып, қажетті жиһаздар сыйлады.
«Биыл 2020 қайырымды іс жасау теміржолшылар ұстанымына айналып отыр. Оған әркім қал-қадірінше үлес қосуда. Біз балалар үйінің түлегіне қаржылай-заттай көмек ұйымдастырып, оның қоныстойымен құттықтай барып, шаңырағына шашуымызды шашып, сый сияпатымызды беріп қайттық. Біз өз ісіміз арқылы ата-анасыз, қамқорлыққа зәру болып өскен жасқа қазақтың салт-дәстүріне сай көмек жасап қуантқымыз келді», – дейді Қандыағаш вагон депосының бастығы Еркін Жананбаев.
Вагоншылар бір бұл емес, жастардың бойына қайырымдылық сезімін ұялатып, өскелең ұрпақты рухани тәрбиелейтін қамқорлық шараларын жиі ұйымдастырады. Тағдырдың тауқыметін тартып, ата-анасыз өскен жас жігіт Әбілқайыр Құмбановты қоныстойымен құттықтаған вагоншылар әрекетіне көп сүйсінді. Ал олар сыйлаған тұрмыстық техника, жиһаздар жас жігіттің жұпыны тірлігін жасандырып жіберді.