Жақсылық эстафетасы жалғасуда
Маңғыстау облысы бойынша меншікті тілші
Маңғыстаулық теміржолшылар «Жақсылық жасап жарысайық!» ұранымен қайырымдылық эстафетасын жалғастыруда. Өткен аптада эстафетаны Болашақ станциясындағы «Профитол» ЖШС жалғастырып, олар Болашақ станциясына табыстаған еді.
Станция ұжымы игі істі әрі қарай жалғастырып, әлеуметтік осал топқа жататын, денсаулығына байланысты жұмысқа жарамсыз, асыраушысы жоқ, күнкөріс деңгейі төмен төрт жанұяға азық түлікпен көмектесті. Ұн, май, күріш, макарон, қант сияқты күнделікті тұтынатын ең қажетті өнімдерді жеткізіп берді.
− Бұл шара елімізде болып жатқан қазіргі кезеңге байланысты әлеуметтік қолдауға мұқтаж жандарға аз болса да көмек болып тұр. Көп болып сондай отбасыларға көмек қолын созу – біздің азаматық парызымыз. Станциямызда жұмыстан шығып қалған немесе мүлде жұмыссыз, күнкөрісі қиын азаматтар жоқ. Барлығы жұмыста. Бір ғана жалғызбасты ана болатын, оған бізге эстафетаны жолдаушылар көмектесті. Сондықтан біз Жаңаөзен қаласынан төрт отбасыны таңдап алып, тиісті көмегімізді жасадық. Мұндай іс шаралар мұнымен тоқтап қалмайды. Енді тек теміржолшылар емес, Болашақ елдімекенінің тұрғындары бірігіп осындай игі істі ұйымдастыру ниетіміз бар, – дейді станцияның бас инженері Ғани Қуанышов.
Болашақ станциясы ұжымынан эстафетаны фейсбук желісі арқылы Болашақтағы ПЧ-8 телімінің басшысы Арман Қалилаев пен Өзен станциясының бастығы Самат Сәриев қабылдап алды.