Теміржолшы әріптестеріне көмек көрсетті
Елдегі төтенше жағдайға байланысты азық-түлік пен аса қажетті тауарлар алудан көмек қажет ететін отбасылар қатары артқаны белгілі. Осыған орай Астана ірілендірілген жол дистанциясы ұжымы мекеменің кәсіподақ ұйымымен бірге теміржолшы әріптестеріне көмек көрсетіп, қайырымдылық шара өткізді.
«ҚТЖ -2020 игі іс», «Біз біргеміз!» акциялары аясында 14-15 сәуірде жолшылар өз қызметкерлері арасынан көп балалы, аз қамтылған, мүгедек баласы бар отбасыларға және карантин аумағында пойыздар қозғалысының қауіпсіздігін қамтамасыз етіп отырған жол монтерлеріне азық-түлік себетін жеткізіп берді. Бұл себеттер ең алдымен №39, 96 бекеттер мен Нұр-Сұлтан және Қырқыншы станцияларының жол монтерлеріне таратылды. Дистанцияның кәсіподақ комитетінің төрағасы Асылхан Тоқтыбаевтың айтуынша, бірінші кезекте қажет өнімдерден барлығы 130 азық-түлік жиынтығы дайындалып, үлестірілген.
– Қазір ел басына күн туған шақта әрбір адам, әр ұжым ауызбірлікте өмір сүріп, қамқорлық пен жанашырлықтың аса маңызды екенін жете түсіне бастады. Біз де осындай сынақ кезінде кейбір әріптестерімізге қолдау көрсетуді жөн деп таптық. Осы қайырымдылық акциясын өткізуге қолдау білдірген дистанция кәсіподақ ұйымы мен «Қазпрофтранс» ҚБ «Астана» торабы филиалының басшысы Серік Сәрсекеевке алғыс білдіргіміз келеді. Олар жолшылар бастамасына бірден қолдау білдірді. Сонымен қатар осы акцияның барлық ұйымдастыру жұмыстарына атсалысқан ұжымның кадрлар бөліміне, басқа да қызметкерлерге рахмет айтамын, - дейді дистанцияның директоры Қайрат Иланов.
Мұндай көмек сонымен қатар №2,3 жол колонналары мен №4,5,6 өндірістік телімдер және «Нұрлы жол» телімі, көліктік, диагностикалық, жасанды имараттар блоктары мен ақаутапқыш цехының жұмысшыларына да берілген. Дистанциядағы қайырымдылық акциясынан Бурабай, Ерейментау бағытындағы телімдері мен колонналардың жолшылары да құр қалмай, олар да азық-түлік пакеттерімен қамтамасыз етіліпті.
Бурабай бағытында №1,2,3 өндірістік телімдер мен №1 колонна, Ерейментау бағытында №6,7 өндірістік телім мен №3 колонна жұмысшыларына барлығы 75 азық-түлік пакеті таратылған. Бұл жол шаруашылығы мамандары – Макинка, Жасыл, Елтай, Ақкөл, Шортанды, Төңкеріс, Ерейментау, Сарыоба, Еркіншілік, Едіге станцияларында еңбек етіп жатқан теміржолшылар.