Сексеуілдік жастар да үн қосты
Ұлы Отан соғысындағы Жеңістің 75 жылдығына орай ұйымдастырылып отырған «Жеңіс» әлеуметтік-қайырымдылық жобасы Сексеуіл локомотив пайдалану депосында да жүзеге асырылуда.
Теміржол жастары арнайы дайындалған азық-түлік өнімдерін соғыс және тыл ардагерлерінің үйіне жеткізіп беріп, жанжақты көмектесуде. Әлемде және елімізде жаһандық дертпен күрес жүріп жатқан кезеңде қарттарға көмек – басты парызға айналып отыр. Депоның ерікті теміржолшылары алдымен Сексеуіл кентінің тұрғыны, соғыс ардагері Талжан Жанасовтың үйіне барды.
Ақсақалдың жағдайын біліп, ақ батасын алды. Одан соң соғыс кезінде тылда жұмыс істеген ардагерлер - Қабылқожа Сарманов, Үржан Наурызбаева, Тазагүл Бармақбаева, Молдабай Ахметов, Еңсепбай Боранбаев, Балжан Дүспаевалардың шаңырағына да қайырымдылық көмекті жеткізді. Сексеуіл кенті бойынша 1 соғыс және 6 тыл ардагері көмекпен қамтылды. Ал жалпы Арал ауданы көлемінде осындай көмекті олар 40 ардагерге көрсетілген.
Сексеуіл локомотив пайдалану депосы бастығының өндіріс жөніндегі орынбасары Еркебұлан Аяғановтың айтуынша, аталған шараға деподан 9 ерікті жас теміржолшы шыққан.
– Мұндай шаралар бүгінгі қоғамды отаншылдыққа тәрбиелейді. Рухани құндылықтарды насихаттап, ардагерлердің біз үшін еткен ерліктеріне тағзым етуге, құрмет көрсетуге мүмкіндік беретін бастама. Осы мүмкіндік биыл теміржолшыларға беріліп тұр. Қарияларымызға денсаулық тілейміз, әлі де ортамызда шежірелі қазынамыз болып жүре берсін, – дейді Е. Аяғанов.
«Жеңіс» – «Самұрық-Қазына» АҚ компаниялар тобының атынан «Samruk-Kazyna Trust» Әлеуметтік жобаларды дамыту қорының қолдауымен жүзеге асырылатын және ардагерлер мен тыл еңбеккерлеріне көмек көрсетуге бағытталған республикалық әлеуметтікқайырымдылық жоба. Ол 2015 жылы - Ұлы Отан соғысындағы Жеңістің 70 жылдығы аясында бастау алды және осымен 5 жыл бойы жалғасуда. Басты мақсат - 9 мамыр күні ғана емес, жыл бойы ардагерлерге қамқорлық көрсету. Жоба аясында волонтерлік рейдтер, сондай-ақ жас ұрпақты тәрбиелеуге және тарихты сақтауға бағытталған басқа да іс-шаралар өткізіледі.