Еріктілер еңбегі елеулі
«Қазақстан теміржолшысы» газетінің тілшісі
Қазір адамдардың санасын ғаламтордың құдіреті билеп алған шақта ұрпағының бойына қайырымдылық қасиеттерін сіңіріп өсірген қазақтың даналығына сүйсініп, арамызда жаны ізгілікке толы жастардың қалың шоғыры бар екенін көріп сүйсінеміз.
Сөзіміздің дәлеліне, шымкенттік теміржол жастарынан құралған еріктілер тобының игі бастамасын, жолай ақтөбелік жастар жалғастырып, соңын атыраулық еріктілер тәмамдаған оқиға негіз болмақ. Сонымен...«Қазақстан темір жолы» ұлттық компаниясы биыл «Еріктілер жылы» аясында «2020 игі іс» бағдарламасын қабылдап және оны теміржолшылар қауымы, әсіресе, жастардан құралған еріктілер тобы белсене қолдап, жүзеге асыруға білек сыбана кіріскен еді. Бүгінде бағдарламада қарастырылған 2020 игі істің жартысынан көбісі орындалып үлгерген. Сондай игілікті істің бірінің жүзеге асуына биылғы ақпан айында Шымкент жүк тасымалы бөлімшесінің жас қызметкерлерінен құралған еріктілер тобы ұйытқы болыпты. Жас теміржолшыларға 7 жасар қызымен қиын жағдайға тап болған Рустем Үркімбаевқа Атырауға дейін теміржол көлігімен жетіп алуға көмектесуге ұсыныс келіпті.
Теміржолшы жастар лезде бұл ұсынысқа үн қатып, өз қалталарынан ақша жинап, мұқтаж жандарға Шымкенттен Атырауға дейін пойызға билет сатып алып шығарып салыпты.
«Теміржолдағы ерікті жастардың чаты бар. Соған шымкенттік жастар Рүстем мен оның қызын пойызға отырғызып жібергендерін жазып, атыраулық жастарға оларды қарсы алып, көмек көрсетулерін өтінген болатын. Мұны естіген Ақтөбе жүк тасымалы бөлімшесінің еріктілері Қандыағаш станциясы арқылы өтетін транзиттік жолаушылар пойызындағы Рүстем мен оның жеті жасар қызын аталған станцияға келіп тоқтағанда ыстық тамақпен қамтамасыз етіп, Атырауға жөнелтіп салды. Ал Атырауға түнде келіп тоқтаған пойыздан жолаушыларды Атырау жүк тасымалында еңбек етіп жатқан жастар қарсы алып, діттеген жерлеріне жеткізіп салыпты», – деп жастардың қайырымды істерімен бөлісті «ҚТЖ» ҰК» АҚ Адами ресурстарды басқару департаментінің менеджері Нәзира Бердібекова.