Маңғыстаулық жастар ардагерлердің тұрмыс тіршілігімен танысты
Маңғыстау облысы бойынша меншікті тілші
ҚТЖ-ның «2020 игі істер» жобасы аясында Маңғыстау теміржолының ерікті жастары өңірдегі Ұлы Отан соғысының қатысушылары мен тыл ардагерлерінің үйіне барып, Жеңістің мерекесімен құттықтауда.
Аталған игі шара Ұлы Жеңістің 75 жылдығына орай «Жеңіс» жобасын жүзеге асыру бағытында ұйымдастырылуда.
Жобаны Жаңаөзен қаласы бойынша жеті және Ақтау қаласы мен аудандардан тағы жеті теміржол жастарынан құралған еріктілер тобы жүзеге асыруда. Жуырда олардың бір тобы Түпқараған ауданының Форт-Шевченко қаласында тұратын ардагерлерге азық-түлік жеткізіп, тұрмыс тіршілігімен танысып қайтты.
− Қазір бізде Жаңаөзен қаласын қоспағанда 11 ҰОС ардагері мен 93 тыл ардагері бар. Содан 40-ның жыл соңына дейін хабарын алып, азық түлікпен қамтып тұруымыз керек. Әрқайсысына 4 реттен барамыз. Теміржолшылардан құралған ерікті жастар жоспар құрып бөліп алғамыз. Жуырда Форт-Шевченко қаласындағы 10 тыл ардагеріне азық-түлік жеткізіп бердік. Мұндай жұмыстар Жаңаөзен қаласы бойынша сол жақтағы әріптесіміз Арман Айлатуровтың жетекшілігімен де іске асуда. Жоба Жеңіс мерекесіне орай «Самұрық Қазынаның» әлеуметтік қоры «Самұрық Трастың» қолдауымен өңірдегі ардагерлерге көмек, әсіресе бүгінгідей карантин жағдайында барынша қолдау жасауды көздейді, – дейді жобаның Маңғыстаудағы үйлестірушісі, Маңғыстау вагон депосының вагон қараушы-жөндеушісі Қуатбек Көпбаев.