Соғыс ардагері Күбір Тілешовты құттықтады
Маңғыстау облысы бойынша меншікті тілші
Маңғыстау теміржолының басшылығы Жеңістің 75 жылдығына орай өңір теміржолының көзі тірі жалғыз соғыс ардагері Күбір Тілешовты құттықтап барды.
Ұлы Жеңістің 75 жылдығымен қатар 96 жасын тойлап отырған қария бүгінде ұрпағының алып бәйтерегіне айналған.
Биылғы Жеңіс күнін 6 баласынан тараған 25 немере, 33 шөбересімен қарсы алды. Жылдан жылға өзінен тараған бұтақтардың бүр жарып, гүл ашып, жемісі көбейіп жатқанын көріп бір жасарып қалатын қария үйіне келген меймандарды әдеттегіше жылы қабылдады.
Кісі келеді деген күні орденмедальдері тағылған салтанатқа киетін костюмін иығына іліп, қонақ қабылдауға дайындалады.
Бұл жолы да басқалардан да көбірек әріптестерін күткен болу керек, теміржолшылар келді дегенде балаша қуанды. Ақсақалдың қуанышын бөлісіп, Жеңіс күнімен құттықтауға Маңғыстау жүк тасымалы бөлімшесінің директоры Нәжімеден Ғұбашов, персоналды басқару бөлімінің басшысы Екпін Қожахметов, бөлімше кәсіподағының төрағасы Әзірбай Тұрмағанбетов пен ардагер тұратын Жетібай станциясының бастығы барған еді.
Қарт майдангерге лебіздерін арнап, алып барған сый-сияпат, тартуларын табыстаған олар ардагердің әңгімесін тыңдап, тұрмыс тіршілігімен танысты.
«ҚТЖ - Жүк тасымалы» АҚ бас директоры Қайрат Сәуірбаевтың алғысы мен ақшалай және заттай сыйлығын, Маңғыстау бөлімшесі басшылығы мен кәсіподағының құттықтауын, сыйлықтарын тапсырды.