Соғыстың соңғы сарбаздары
Абай облысы бойынша меншікті тілші
Жеңістің 75 жылдық мерекесіне орай Семей ЖТ бөлімшесінің басшылығы байырғы әріптестері, жергілікті соғыс ардагерлерінің үйлеріне арнайы бас сұғып, амандық сұрасты. Қарт жауынгерлерге мерекелік сыйсияпаттарын да тарту етті.
Семей магистральдық желі бөлімшесінің басшысы Айдын Шәукежанов, семейлік кәсіподақ ұйымының төрағасы Алик Досанов пен Семей байланыс және белгі беру дистанциясының бастығы Бейбіт Түменғали және осы мекеменің бастауыш ардагерлер ұйымының төрағасы, ардагер-теміржолшы Мақсұт Көшжановтар бастаған топ ең әуелгі кезекте қарт майдангер Дмитрий Литвиненконың үйіне келді.
Өңіріне Қазақстан туы түстес көгілдір жеңіс лентасын таққан қарттың денсаулығы жақсы, әлі тың екен. Жеңістің 75 жылдығымен арнайы құттықтай келген сала басшыларына, теміржолшыларға соғыс даласында түскен жастық шағындағы фотосуреттерін көрсетіп, сол бір сұрапыл жылдарды, ұрыс даласында бақилық болған қаруластарын, өткен күндерді еске алды.
Дмитрий Литвиненко 1943 жылы 17 жасында соғысқа аттанып, жаяу әскерлер сапында батыс Еуропаны басқыншылардан азат етуге қатысқан.
Майдан даласында-ақ байланысшы болған жауынгер елге оралған соң да теміржол саласында қызмет атқарып, радист болып ұзақ жылдар бойы еңбек етіпті. Бөлімше басшылары қарт жауынгерді мерейлі мерекемен құттықтап, Жеңістің 75 жылдығына арналған арнайы сыйлықтары мен азық-түлік себетін ұсынды. Келесі кезектегі ардагер ШЧ-29 мекемесінің байырғы теміржолшысы Кәмкетай Байыров болды.
Әдеттегіше, әріптестерін теңізші формасымен қарсы алған қарт өткен-кеткеннен қозғап естелік әңгіме де шертті. Осындай мереке күндері арнайы құттықтап келетін теміржол саласының басшыларына алғысын да білдірді.
– Мен теміржолға қызметке келген жылдары осы салада 2 мың 200-дің үстінде майдангер еңбек етуші еді. Бүгінде солардан тек екі адам ғана арамызда жүр. Екеуі де ШЧ-29 мекемесінің ардагерлері, - деп атап өткен Мақсұт Көшжанов ақсақал 94 жасқа аяқ басқан қарияға зор денсаулық, ұрпақ қызығын көруді тіледі.
Соғыстың соңғы сарбаздарына амандық сұраса барған семейлік теміржол саласының басшылары олармен естелік суретке түсті.