Жаз – менің арманым
Үстіміздегі жылдың 11 маусымында Қарағанды бөлімшесінде онлайн-режимінде өткен «Жаз – менің арманым» балалар суреті байқауының жеңімпаздарын марапаттау рәсімі өтті.
«Қазақстандық салалық теміржол, автомобиль, әуе және су көлігі қызметкерлерінің кәсіби одағы» ҚБ Қарағанды филиалы балаларды қорғау күні қарсаңында, яғни 25 мамыр мен 5 маусым аралығында «Жаз – менің арманым» балалар суретінің байқауын өткізген болатын. Түрлі түсті бояумен және карандашпен салынған шығармашылық жұмыстар онлайн режимінде ұсынылды.
Байқауды ұйымдастырушылар суреттердің тақырыпқа сай бояулары ашық та қанық болғанын, әр суретте бала қиялынан туындаған бақытты сәттер, әдемілік әлеміне жетелейтін жақсы көріністер сәтті берілгенін айтады.
Сонымен, биылғы байқаудың қатысушысы және жеңімпазы ретінде 57 бала танылып отыр екен. Кәсіподақ филиалының төрағасы Яхия Альмусин суреттер байқауы филиал тарапынан жыл сайын өткізіліп тұратынын және де осы конкурсқа қатысқан барлық балаға алғысын білдірді. Instagram-да ұйымдастырылған конкурстық жұмыстар көрмесі расында жұртшылыққа көтеріңкі көңіл-күй, оң эмоция сыйлағаны байқалады.
Арнайы сыйлықпен марапатталғандар қатарында «Instagram-дағы шығармашылық табыс» номинациясы бойынша Қарағизов Жомарттың (Жаңаарқа жол дистанциясы), «Бояулардың ашықтығы және қызықты композициялық шешім» номинациясында Асанов Қазыбектің (Жаңаарқа белгі беру және байланыс дистанциясы) жұмыстары атап өтілді.
Сондай-ақ, үш жүлделі орын бойынша 6 жастан 8 жасқа дейінгі балалар арасында Мироненко Константин (Қарағанды белгі беру және байланыс дистанциясы), Жанболат Айғаным (Балқаш белгі беру және байланыс дистанциясы), Исакаев Әли (Ақадыр белгі беру және байланыс дистанциясы), ал 9 жастан 12 жасқа дейінгі балалар арасында Дәулетбай Дариға (Ақадыр белгі беру және байланыс дистанциясы), Шмелева Ульяна (Қарағанды электрмен жабдықтау дистанциясы), Садық Фатима (Қарағанды магистральдық желі бөлімшесі) ақшалай сыйлықпен марапатталды. Барлық қатысушыларға дипломдар мен ынталандыру сыйлықтары табыс етілді.