"Абай әлеміне саяхат" челленджін бастады
Абай облысы бойынша меншікті тілші
Қоғамдық өмірден қашан да шет қалмайтын шығыстағы теміржолшылар қазақтың ұлы ақыны, ойшылы Абайдың туғанына 175 жыл толуына орай жаңадан челлендж бастады. Бұл ретте аймақтағы сала қызметкерлері «Ұлы Абайдың ізімен» атты рухани жоба аясында ұлылар туған өлкеге саяхат жасап, әлеуметтік желілердегі парақшаларында хакімнің өміріне қатысты тарихи орындар жайлы қызғылықты фотосуреттер мен танымдық деректер, ойтолғамдарын жариялауы тиіс.
Семейлік теміржолшылардың бұл идеясы әсіресе жастар қауымы арасында қызу қолдау табуда. Мәселен, өткен демалыс күндері сала қызметкерлерінің бір шоғыры Абайдың мерейтойына орай ақын өмір сүрген өлкеге рухани сапарға шығып қайтты.
Айта кетерлігі, Шыңғыстау төріне жасалар мұндай экспедициялар теміржолшыларға қолайлы болуы үшін негізінен аптаның сенбі-жексенбі күндеріне ұйымдастырылады.
Бұл жолы жол талғамайтын көлікпен шыққан топ екі күннің ішінде Мұхтар Әуезовтің «Абай жолы» роман-эпопеясының желісі бойынша өздері белгілеп алған тарихи орындардың барлығында дерлік болып қайтты.
Топ басшысы, Семей ЖТ бөлімшесінің жетекші инженері, жас теміржолшы Бауыржан Көкеновтің айтуынша, экспедиция ең алдымен Абайдың кіндік қаны тамған Сырт Қасқабұлақ өлкесінде болып, ондағы жаңадан тұрғызылған нысандарды толық аралаған. Сол тәрізді жас Абай мен Тоғжанның махаббатына куә болған әйгілі Орда тауының басына шығып аялдапты.
Жыр-дастанға арқау болған қос мұңлық – Еңлік-Кебек кесенесіне де зиярат еткен. «Әйгерім бұлағының» басындағы этноауылда алтыбақан теуіп, асық ойнауға да мүмкіндік туған. Әрине, Жидебайдағы Абайдың өзі салдырған қыстау, бүгінгі әдеби-мемориалдық мұражайда болып, ақынның өмірі мен шығармашылығына да қаныққан. Сол тәрізді «Қазақстанның киелі жерлерінің географиясына» енген Қоңыр әулие үңгірінде болып, жерасты көлінің шипалы суына шомылудың да сәті түсіпті. Бұл орын «Абай жолы» романында кеңінен суреттелетіні белгілі.
– Биыл ЮНЕСКО көлемінде аталып өтетін Абай тойына арнап теміржолшылар қауымы осындай ерекше шараны қолға алдық. Сол орайда, ел Президенті Қасым-Жомарт Тоқаевтың «Абай және ХХІ ғасырдағы Қазақстан» атты мақаласында «Тойдан бұрын ой болуы керек» деп айтқанындай, Абайдың өмірі мен қалдырған тағылымына мән беруді көздедік. Еңбек демалысын алған семейлік сала мамандары арнайылап Абай өскен өлкеге отбасымызбен барып қайттық. Мәдени туризм аймағымызда қарқынды дамып жатыр екен. Алған әсеріміз керемет, – дейді бұл ретте пікір білдірген топ жетекшісі Бауыржан Көкенов.
Қазақтың дана ақыны жайлы эрудициялық көкжиекті кеңейтіп, рухани-эстетикалық талғам қалыптастыратын мұндай сапарлар теміржолшылар үшін берері мол екен.
– Тіпті, 4-сыныпты Шөптіқақ станциясының «Абай жолы» роман-эпопеясында бірнеше мәрте аталатынын, бір заманда ақынның қонысы болғанын естіп-біліп таң-тамаша болдық. Туған өлке тарихын да аталмыш рухани сапар барысында кеңінен зерделеуге мүмкіндік туды, – дейді теміржолшылар.
Рас, сала қызметкерлеріне сайын дала төсінде жүрсе де арақашықтықты сақтап, санитарлық талаптарды орындауға тура келген. Сол тәрізді күшінде қалдырылған кейбір шектеулерге байланысты ұжым болып баруға да әзірге мүмкіндік болмай тұр. Дегенмен, бас ақынның тойы өткізілетін тамыз айына дейін аталмыш рухани жоба аясында Абай туған өлкеге талай теміржолшының ат ізін салатыны анық.