Теміржолшылар ақын өлеңдерін жатқа оқыды
Ақтөбе облысы бойынша меншікті тілші
10 тамыз – Абай күніне орай теміржолшылар ақын өлеңдерін жатқа оқудан жарысуда. Челлендж «ҚТЖ» ҰК» АҚ-на қарасты барлық бөлімшелер мен мекемелер арасында тез тарады. Теміржолшылар өлең оқуды Telegram, Instagram және Facebook әлеуметтік желілері арқылы қабылдап жатыр.
Биыл Абай Құнанбаевтың туғанына 175 жыл. Елдегі қиын жағдайға байланысты ұлы ақынның құрметіне арналған халықаралық деңгейдегі айтулы мерекелер кейінге қалдырылды.
Десек те, артына өшпестей із қалдырған ұлы ойшылдың туған күнінде әр қазақ бір-біріне рухани қолдау жасауда. Қазақстан теміржолшылары да айтулы мерекені ескерусіз қалдырмады.
«Ұлы Абайды оқу – өзіңді, қазақы болмысыңды тану. Абайды оқып, ойдағы сөзді, бойдағы мінді түзейміз, адамдық қасиетке ұмтыламыз» деп әлеуметтік желіде теміржолшылар арасында жарияланған челлендж көпшілік қолдауына ие болуда. Ақтөбе жол бөлімшесі Дөң станциясы Батыс Қазақстан теміржолшыларынан эстафета қабылдаған Ақтөбе ЖТ бөлімінің қызметкері Әнуар Іштаев:
«Өлең – сөздің патшасы сөз сарасы,
Қиыннан қиыстырар ер данасы» деп бастап, эстафетаны әрі қарай Атырау және Маңғыстау жол дистанцияларына жолдады.
Ал Ақтөбе станциясының қызметкері Жансая Төреғұлова:
«Есіңде бар ма жас күнің, Көкірек толы, бас күнің...» деп жалғастырды.
Теміржолшылар Абай өлеңдерін жатқа оқу Ұлы ғұламаға құрмет көрсету әрі ұрпақ тәрбиелеудің тиімді тәсілі дейді.
«Абай өлеңдерін бала күнімізден оқып өстік. Тек біз ғана емес, оны әлем елдері аударып оқыды. Осындай ұлы ақынымыздың өлеңдерін әр теміржолшы жатқа айтқаны қуантады», – дейді Ақтөбе темір жол жастарының басшысы Дархан Әнуаров.