Болашақ теміржолшылар да қатысуда
Тұңғыш Президент Нұрсұлтан Назарбаевтың бастамасымен қолға алынған «Жастар – Ел тірегі» ұлттық жобасы сұранысқа ие өнеркәсіптік және сервистік 100 мамандық бойынша 180 колледж бен 20 ЖОО жаңғыртуды және білікті мамандарды даярлауда халықаралық тәжірибені енгізуді мақсат етеді. Бағдарлама аясында Тараз темір жол көлік және коммуникация колледжі осы екі мамандық бойынша қатысуда.
Арнайы пәндер оқытушысы Жеңіс Тайбековтің сөзіне қарағанда, тоқсан жылдық тарихы бар арнаулы орта білім ордасының бұл үдеден шығуға толық мүмкіндігі бар.
«Біздің колледжде бүгінде 700-ге тарта болашақ теміржолшы білім алады. Ал мынау жобаның арқасында білім ошағының материалдық-техникалық базасы бұрынғыдан да нығайып, құзіреттілік орталығы пайда болатынына қуаныштымыз», – деп атап өтті ол.
Бағдарлама аясында дайындалатын мамандықтарды оқытушылардың бірі Төлепберген Ділдабеков енді сала мамандарының сапасы арта түсетініне сенімді.
«Жас кадр әрбір саланың ертеңгі тұтқасы емес пе? Теміржол саласының экономикамыздың күретамыры екені тағы белгілі. Жобаға қатысатын маман дықтардың бірі – Темір жол жылжымалы құрамдарын пайдалану, жөндеу және техникалық қызмет көрсету болса, бұл бойын ша білім алушылар электровоз машинисінің көмекшісі және тепловоз машинисінің көмекшісі болып шығады. Содан соң тәжірибелерін арттыра келе, қызметтері өсе береді. Екіншісі – Темір жол көлігіндегі автоматика, телемеханика және қозғалысты басқару. Бұл бойынша оқыған студенттер сигнал беру, орталықтандыру және бұғаттау құрылғыларына қызмет көрсету және жөндеу электр монтері болады», – деді Т.Ділдабеков.
Колледж студенті Дінмұхамет Серікбаев мемлекетіміздің жастарға сенім артып, осындай мүмкіндік беріп жатқанына қуанышты. Оның ойынша, бұл жоба білім алушыларға үлкен мүмкіндіктер береді. Оқу орнынан кейін жұмыспен қамтылуға септеседі. Ең бастысы, сапалы білім алуға негіз болады.