Теміржолшылар 32 бүлдіршінге сыйлық жасады
Қызылорда облысы бойынша меншікті тілші
Қызылорда белгі беру және байланыс дистанциясының басшылығы мен кәсіподақ ұйымының ұйымдастыруымен ұжым теміржолшыларының биыл мектеп табалдырығын аттайтын балаларына, 32 бүлдіршінге сыйлық жасап, олардың қуанышымен бөлісті.
Ұйымдастырушылар биылғы эпидемиялық жағдайға байланысты бүлдіршіндердің сыйлығын олардың ата-аналарына табыс етті. Ал, дистанция телімдерінде тұратын еңбеккерлердің балаларына жеткізіп беру үшін телім басшыларын арнайы шақырып табыстады. Бұл – дистанцияда жылда дәстүрге айналған шара. Биыл да сол дәстүрді бұзбай, мектеп табалдырығын аттайтын бүлдіршіндерге базарлық жасау қажет деп шешті.
– Қазіргі таңда елдегі ахуалға байланысты сақтық шараларына басымдық беріліп, мектептерде де сабақ онлайн режимде өтеді деп күтілуде. Бірақ соған қарамастан біз бірінші сыныпқа баратын балаларға жылдағыдай іші қажетті оқу-құрал жабдықтарымен толтырылған мектеп сөмкесін жинап, ата-аналарына бердік. Бұл олардың ата-аналары үшін бүгінгідей қиын кезде тәп-тәуір көмек, –деді дистанцияның кәсіподақ ұйымының төрайымы Ғалия Қожахметова.