Жас мамандар 60 ардагерге азық-түлік себеттерін таратты
«Қазақстан теміржолшысы» газетінің тілшісі
1 қазан – Қарттар күні қарсаңында жылдағыдай саналы ғұмырын отандық теміржол саласының дамуына сарп еткен қарияларға құрмет көрсету дәстүрі биыл да ұмыт қалған жоқ.
«ҚТЖ» ҰК» АҚ Адами ресурстарды басқару департаментінің ұйымдастыруымен және ЕРА ОТЛК мекемесінің демеушілігімен ерікті теміржолшы жастар және жас мамандар 60 ардагерге азық-түлік себеттерін таратты.
– Қарты бар үйдің қазынасы бар деген. Біздің ұлттық компанияның да зейнетке шыққан қариялары қашан да зор құрметке лайық. Біз оларды қашан да назардан тыс қалдырмаймыз, елдегі жағдайға қарамастан биыл да қарттар күні мерекесіне орай демеушілер көмегімен азын-аулақ сый-сияпат жасап, көңіл білдіріп қойғымыз келді, – дейді «ҚТЖ» ҰК» АҚ Адами ресурстарды басқару департаментінің бас менеджері Ақмарал Байғабылова.
Мұндай шаралар ұрпақтар сабақтастығы үшін зор маңызға ие.
Қазіргі жас буын осындай игі істерді қолға алып, қартын қадір тұтса, келер ұрпақтың да осы дәстүрді ұстанары анық дейді оны ұйымдастырушылар.