Құрметті теміржолшыға көше атауы берілді
Абай облысы бойынша меншікті тілші
Өткен сенбі күні Аягөз қаласында осы станцияда ұзақ жылдар бойы еңбек еткен вагон шаруашылығының ардагері, Құрметті теміржолшыға көше атауы берілді.
Теміржолшылар шаһарында ел арасында бұрыннан «Заезжий двор» деп аталып кеткен үлкен көше ендігі аралықта өз заманында темірден түйін түйген теміржолшы атанған Жантұяқ Мұсапарбековтің атымен аталатын болды. Осыған орай өткен салтанатты шараға жергілікті теміржолшылар қауымы, ардагерлер, даңқты тұлғаның ұрпақтары, көше тұрғындары қатысты.
Тоқтала кетсек, Жантұяқ Нұрбайұлы 1943 жылы, небары 16 жасында Аягөз вагон жөндеу депосында ағаш ұстасы болып алғашқы еңбек жолын бастаған екен. Соғыс өрті қызып тұрған шақта уақытпен санаспай еңбек етіп, ешқандай станок, техникасыз ауыр бөлшектерді жөндеп, вагондарды қалпына келтіріп, тұтас жылжымалы құрамдарды желі бойына шығарған. Депода майдан даласына жол тартатын әскери эшелондар да жөндеуден өтіп отырған.
Осылайша, өмірінің соңына дейін табан аудармай Аягөз вагон жөндеу депосында еңбек етіп, талай шәкірт тәрбиелеген Жантұяқ Нұрбайұлының ерлікке толы еңбек жолынан көзкөргендер естеліктер айтып, ізгі лебіздерін білдірді.
Биылғы Түрксібтің 90 жылдық мерейтойына орай Семей ЖТ бөлімшесінің аймақтық ардагерлер кеңесінің төрағасы Серік Акишевтің бастамасымен бірқатар ілкімді істер қолға алынып отыр.
Бір бұл емес, жуырда қаладағы Маяковский көшесі соғыс ардагері, Құрметті теміржолшы, аягөздік даңқты машинист Сатыбалды Ешмағамбетовтің есімі берілмек.