Ең үздік жасақ бастығы

Темір жол саласындағы еңбек жолын әскерден келген соң 1991 жылы Ақтөбе станциясындағы өрт сөндіру пойызында қатардағы өрт сөндіруші болып бастаған Маңғыстау өртке қарсы қызмет жасағының бастығы Қайырхан Таласов ердің жасы елуге толып отыр. Отыз жыл ғұмырын осы салаға арнап, кәсібінен береке тапқан жанды теміржол бойындағы ең үздік жасақ бастығы десек, артық айтпаймыз. 

Өткен аптада Маңғыстау магистральдық желі басшылығы мерейтой иесін арнайы құттықтап, өңір теміржолының өркендеуіне қосқан үлесіне алғыс білдірді. Айтса айтқандай, Қайырхан Мамайұлы – шынымен де өз кәсібіне шын берілген жан. Өзге мекеменің қуысында, аядай ғана бөлмеде отырып-ақ жасақтың бар шаруасын дөңгелетеді. Оған қызметтік көліктің болмауы да, басқа басшыларға тән «үлде мен бүлдеге» оранған кабинеттің жоқтығы да кедергі емес. Сөйтіп жүріп Маңғыстау өртке қарсы қызмет жасағын көштің басына шығарды. Мекеме 2015 жылдан бері республикалық салалық жарыста үздік үштіктің қатарынан түспей келеді. 2015 жылы үшінші орынды алса, 2016 жылы бірінші орынға көтеріледі. 2017 жылы екінші орыннан көрінді. 

2018 жылы тағы да үшінші, ал өткен жылы екінші орынды иемденді. Осы жылы да жүлдеден үмітті. 

 Қайырхан Таласовтың өзі де жетістіксіз емес. ҚР Көлік және коммуникация министрінің Алғыс хаты мен «Қазақстан темір жолы» Ұлттық компаниясы президентінің Мадақтау қағазымен марапатталып, салалық жарыс қорытындысы бойынша «Үздік басшы» атанған. 2013 жылы Өзен-мемлекеттік шекара Түркіменстан жаңа темір жолын ашуға қосқан еңбегі үшін «Үздік маман» төсбелгісін алған. Одан бөлек Өрт сөндіру және қалпына келтіру пойыздары департаменті басшылығынан алған марапаттары мен сыйлықтары бір бөлек. 

Осылай, өзінің еңбексүйгіштігімен ерекшеленіп, тынымсыз ізденісте жүретін кәсіби маман отбасында да үлгілі әке. Үлкен ұлы Алтынбек әке жолын қуған, Маңғыстау станциясында пойыз құрастырушы. Екінші ұлы Нұрханбек үшінші курс студенті, болашақ теміржолшы. 

Екі қызы мектеп қабырғасында. Әйелі мемлекеттік қызметте.

− Ақтөбенің Байғанин ауданында туып өстім. 1990 жылдың желтоқсанында отан алдындағы борышымды өтеп келіп, Ақтөбе станциясында өрт сөндіруші болып жұмысымды бастадым. Жоғары оқу орнына дайындық курсынан өтіп, бұрынғы жұмысымды қайта жалғастырдым. 2001 жылы Атырау өртке қарсы қызметінің Маңғышлақ-Өзен телімі бойынша нұсқаушы жұмысына ауыстым. 

2009-2014 жылға дейін Атырау өртке қарсы қызмет жасағы бастығының Маңғыстау өңірі бойынша орынбасары қызметін атқардым. 2014 жылы Маңғыстау өртке қарсы қызметі бөлініп, мекеменің тізгіні маған тапсырылды. Содан бері түбек теміржолының өртке қарсы қызметін басқарамын. Маңғыстау менің құтты мекеніме айналды. Мамандығымды жақсы көремін, қарбаласпен жүріп жарты ғасырдың куәсі болыппыз. Түрлі сәттерді бастан өткіздім, қызық та, қиын да күндер болды. Ең қиын кез осыдан біраз жыл бұрын №16 бекетте жүк көлігі мен пойыз соғысып, 18 цистерна мұнайдың өртенуі еді. Ол біз үшін нағыз сын сағат болды, соғыс жағдайында жүргендей сезіндік өзімізді… 

Ал қызығы… Болашақ станциясы ашылып, Мемлекет басшылары келеді деп күні-түні сол жақта дайындықтамыз. Болашаққа аттанып бара жатқанда үйде әйелім мен үш балам қалған еді. Бір айдан соң келсем, төртеу. 

Біраз уақыт бойы үй бетін көрмей кеткен мені алдымнан кенже қызымызбен күтіп алды, – деп күледі ердің жасы елуге толып отырған теміржолдың үздік өрт сөндірушісі.