Демалыс базаларының жұмысына рұқсат берілген
Абай облысы бойынша меншікті тілші
Өткен апта соңында ШҚО бас санитар дәрігерінің жаңа қаулысы жарияланды. Онда жазылғандай, Бұқтырма су қоймасындағы, Алакөлдегі және «Рахман қайнарлары» санаторийіндегі демалыс базаларының жұмысына рұқсат берілген. Яғни, 1 маусымнан бастап шығыстағы барлық туристік базалар келушілерді қабылдай алады. Ал, осыған орай аймаққа ағылатын туристер нөпірі күтілуде. Қазіргі таңда шығыстағы ең ірі екі әуежай, Өскемен және Алакөл көлі жағалауындағы ұшып-қону алаңдары күрделі жөндеуге жабылғандықтан негізгі күш пойыз қатынасына түседі. Осы орайда ұлттық тасымалдаушы Алакөл бағытында қосымша жазғы пойыздарды іске қосуды жоспарлап отыр. Нақтырақ айтсақ, 17 маусымнан бастап №457/458 «Семей-Достық» пойызы күнара қатынайды. Аталмыш жолаушылар пойызы Семей станциясынан – тақ күндері, Достық станциясынан жұп күндері жөнелтіледі. Сонымен қатар, дәл осы күннен бастап №459/460 «Өскемен-1-Достық» пойызы да күнара жүретін болады. Өскемен-1 станциясынан – тақ күндері, Достық станциясынан – жұп күндері аттанады. Ал 20 маусымнан бастап №257/258 «Нұр-Сұлтан-1-Достық» пойызы аптасына 2 рет қатынайды: жексенбі және бейсенбі күндері. Нұр-Сұлтаннан – дүйсенбі, ал Достықтан жұма күндері жүреді. Бұдан бөлек, курорт аймағына аптасына екі рет қатынайтын №54/53 «Нұр-Сұлтан-Достық» пойызы, сондай-ақ жазғы кезеңде құрамында «Нұр-Сұлтан- Достық» тіркемелі вагоны бар №121/122 «Нұр- Сұлтан-Семей» пойызы, №6941/6942 «Ақтоғай-Семей» пойызына Ақтоғай станциясында қайта тіркелетін болады. Бұл орайда № 21/22 «Қызылорда-Семей» пойызы құрамына «Алматы-Достық» қатынасындағы тікелей вагон жалғанады. – Семейлік теміржолшылар жазғы маусымдағы пойыз кестесіндегі бұл өзгерістерге қазірден бастап даярлық жасап жатыр. Жаңа кесте өңірдегі ұшақ қатынасының уақытша тоқтатылуына байланысты туындайтын қолайсыздықтарды жоюда зор мүмкіндік береді, – дейді бұл орайда Семей ЖТ бөлімшесінің шұғыл өкім беру бөлімінің басшысы Қайрат Ибраев.