Шығыстағы теміржолшылар коронавирус індетіне қарсы екпе алуда
Абай облысы бойынша меншікті тілші
Шығыстағы теміржолшылар қауымы өткен мамыр айынан бастап коронавирус індетіне қарсы екпе алу шараларына белсенді қатысуда. Ерікті түрде вакцина алу қазіргі күні де бәсеңдеген жоқ. Алғашқы кезде Семей қалалық бұрынғы теміржол емханасының мейірбикелері бөлімше мен желі бойындағы жекелеген мекемелерге арнайы келіп, ресейлік «Спутник - V» және «Hayat-Vax» вакциналарын салған. Қазіргі күні теміржолшылар өздері тіркеуде тұрған жергілікті емханаларға барып, ерікті түрде екпе алуда. Сонымен қатар, шаһар орталығындағы сауда үйлерінде де кезекке тұрып вакцинациялануда. Семей ЖТ бөлімшесінің өндірістік-техникалық бөлімі мен өндірістік қауіпсіздік және еңбекті қорғау бөлімдерінің қызметкерлері толықтай вакцина алды деуге болады. Ағзаны вакцинамен «қаруландыру» қалыпты өмір мен қалыптасқан жұмыс ырғағына оралуға әкелетін бірден-бір жол екенін семейлік теміржолшылар қауымы жақсы біледі. Себебі, қызмет барысымен желі бойында, теміржолшылар арасында жиі болатындықтан сақтық шараларын арттыру міндет. – Әуелгі кезекте барша теміржолшы жастар бір кісідей «Спутник-V» вакцинасын алдық. Ешқандай кері әсері болған жоқ. Өзге әріптестеріме ғаламторда жүрген түрлі қаңқу сөздерге сенбеуге, өз денсаулығы мен жақындарының қауіпсіздігін ойлауға шақырамын, – дейді алғашқы болып екпе алған Семей ЖТ бөлімшесінің Жастар кеңесінің төрайымы Арайлым Қосанова. – Маусым айының 8-ші жұлдызына дейін Семей магистральдық желі бөлімшесі бойынша теміржолшылардың 25,4 пайызы екпенің екінші кезеңін толық алып болды. Бұл барша қызметкерлердің төрттен бірінен көп деген сөз. Дегенмен біздің есебіміз бойынша бұл қарқын жаман емес. Алдағы қазан айына дейін ұжымдық иммунитет қалыптастыратындай деңгейде вакцина алып үлгереміз деп ойлаймын, – дейді бұл орайда НЖС-6 кадр бөлімінің басшысы Данияр Баймағұлов.