Тәуелсіздік құрдастарымен кездесу өтті

Қызылорда локомотив пайдалану депосындағы аспан асты және депо мұражайларында саламыздың түрлі қызметінде еңбек етіп жүрген белсенді жастар – тәуелсіздік құрдастарымен кездесу өтті. Еліміз Тәуелсіздік алған жылы дүниеге келіп, бүгінде болат жол саласында еңбек етіп жүрген жастардың басын қосқан шараны өткізуге бастама көтерген – «Nur Otan» партиясы Теміржол филиалы төрағасының бірінші орынбасары Базара Танбаева. Тәуелсіздіктің мәртебесін көтеретін тың істерге атсалысып жүрген теміржолшы жастар партия өкілімен ашық-жарқын сұхбат құрды. – Аймақ теміржолының әртүрлі саласында жұмыс жасап жүрген жастармен кездесу барысында 30 жыл ішінде еліміздің жеткен жетістіктерімен бөлістік. Жастар өз салаларын дамытуға бағытталған ойларын ашық айтып, кейбір келелі мәселелерді оңтайлы шешуге ұсыныстарын жеткізді. Сондай-ақ, тәуелсіздіктің 30 жылдығына орай бұл жастармен алдағы уақытта атқарылатын «30 мейірімді іс» жұмыс жоспарлары жасалып, оны жүзеге асыратын боламыз, – деді Теміржол филиалы төрағасының бірінші орынбасары Базара Танбаева. Кездесу соңында теміржол саласының дамуына өз үлестерін қосып жүрген біршама жастарға партияның Теміржол филиалы төрағасының алғыс хаты мен креативті идеялармен көзге түскен белсенділерге естелік сыйлықтар табысталды.