Шымкент вокзалында 1 шілдеден бастап «Ashyq» мобильді қосымшасы енгізілді

Шымкент қаласының теміржол вокзалында 1 шілдеден бастап «Ashyq» мобильді қосымшасы енгізілді. Содан бері кіреберісте әрбір жолаушы Ashyq қосымшасы арқылы өзінің «жасыл» немесе «көк» мәртебесін растауда. Мұны смартфондағы Kaspi.kz, Homebank, Aitu арқылы немесе вокзал қызметкеріне өзінің ЖСН көрсетуі қажет. Шетелдіктер станциядағы мәртебесін төлқұжат нөмірі бойынша тексере алады. Ал 18 жасқа дейінгі балаларға тексеруден өтудің қажеті жоқ. Сары және қызыл статустағы азаматтар сапарға жөнелтілмейді. Өз мәртебеңізді алдын ала ashyq.kz сайтындағы бейтарап QR-код арқылы тексеруге де болады. Жолаушыларды шығарып салушылар мен күтіп алушы- лар да енді вокзалға тек «Ashyq» қосымшасы арқылы кіре алады. Мәртебесі «қызыл» азаматтарға 87 510 теңге көлемінде айыппұл салынады. Ал «сары» статустағыларға ескерту беріледі. Қазіргі таңда вокзалдың кіреберісінде арнайы қызметкерлер отыр. Олар жолаушыларды кірген кезде «Ashyq» бағдарламасы арқылы тексеріп өткізуде. Айта кетейік, қаланың Бас санитар дәрігерінің қаулысына сәйкес, қызыл және сары статустағыларға билеттердің қайтару ережесі бекітілген. Оларға билет құнының 50 пайызы қайтарылады. Ал бір тәулік бұрын вокзалға кіруге рұқсаты жоқ екенін білгендер билетін сол сәтте қайтарса, ақшасын толығымен ала алады. Мамандар билетті онлайн алуға кеңес береді. Себебі, кері қайтарған жағдайда ақшаңыз сол сәтте түседі. Ал кассадан билет алғандар ақшасын кері қайтару үшін біраз уақыт күтеді.